Qazaqstanda 2015 jyldyń qazan aıynan bastap, saýda jáne qyzmet kórsetý salasynda eńbek etetin kásipkerler jańa nesıe jelisine qol jetkize alady. Bul týraly "Qamshy portaly Qazaqparatqa silteme jasaı otyryp habarlaıdy.
Bul týraly búgin Almatyda Ortalyq komýnıkasıalyq qyzmeti fılıalynyń «Inflásıalyq targetteý rejimine negizdelgen jańa valútalyq saıasat» taqyryby boıynsha ótken kóshpeli otyrysy barysynda «Damý» kásipkerlikti damytý qory» AQ Basqarma tóraıymynyń orynbasary Mıras Beısembaev málimdedi.
Onyń aıtýynsha, «Damý» kásipkerlikti damytý qory» AQ men Azıa Damý banki arasynda 228 mln. dollarǵa ( teńgemen 63-64 mlrd. teńge) nesıelik kelisim jasalǵan. Buǵan Úkimet kepildeme berip otyr.
«Biz sondaı-aq, ekinshi dárejeli tórt bankpen nesıelik kelisimge qol qoıdyq. Azıa Damý banki tarapynan bólinetin 228 mln. AQSH dollary osy tórt bankke teńgeleı salynatyn bolady. Iaǵnı, «Sesnabank» AQ - 86 mln. AQSH dollary, «Qazkommersbank» AQ - 82,3 mln. AQSH dollary, «Delta Bank» AQ - 50 mln. AQSH dollary jáne «Kazınvestbank AQ - 9,7 mln. AQSH dollary balamasymen salynady. Sonymen, kásipkerler aldaǵy aıdyń basynan bastap, sol bankterge júgine alady. Nesıe shamamen 7 jylǵa 14 paıyzdyq mólsherlememen beriledi. Eger alynǵan nesıe ekonomıkanyń basymdyq berilgen salalaryna jumsalatyn bolsa, onda memleket tarapynan 14 pıyzdyq mólsherleme 7 paıyzǵa túsiriledi. Al kepili jetkiliksiz bolyp jatsa, onda «Damý» qory óz tarapynan bul nesıeler boıynsha kepildeme bere alady», - dedi M. Beısembaev.
Sonymen qatar, ol atalǵan nesıe boıynsha valútalyq táýekeldik oryn almaıtyndyǵyn, kásipkerler úshin bul jaǵynan eshqandaı qaýip bolmaıtyndyǵyn aıtty.
«Biz bul jerde valúta-paıyzdyq svop operasıasyn qoldanamyz. Ulttyq bankpen bul jóninde kelisim bar. Iaǵnı, biz syrttan dollarmen aqsha ala otyryp, Ulttyq bankpen valúta-paıyzdyq svop operasıasyn jasaımyz. Valúta baǵamy turaqty túrde bekitiledi. Sodan keıin nesıe teńgeleı ıgerile bastaıdy. Ulttyq banktiń baǵamynyń ózgerýi bul nesıelerge keri áser etpeıdi», - dedi M. Beısembaev.
