Ázerbaıjan Respýblıkasynyń Qytaı Halyq Respýblıkasyndaǵy Tótenshe jáne Ókiletti Elshisi Latıf Gandılov Qazaqstan Prezıdenti Nursultan Nazarbaevty álemge áıgili tarıhı tulǵalar AQSH-tyń 26-y prezıdenti Teodor Rýzveltpen, Ulybrıtanıanyń premer-mınıstri (1940-1945, 1951-1955 jyldary.) Ýınston Cherchıllmen, «qytaılyq reformalar sáýletshisi» Den Sıaopınmen bir deńgeıge qoıady. Bul týraly "Uamshy" portaly Qazaqparatqa silteme jasaı otyryp habarlaıdy.
«Biz belgili bir jetistikter (Qazaqstan halqy Assambleıasy men tutastaı qazaq halqynyń jetistikteri-red.) týraly aıtqanda, onyń ekinshi jaǵyna da nazar aýdarýǵa tıispiz, ıaǵnı munda qurmetti Nursultan Ábishuly Nazarbaevtyń eńbegi eren - onyń saıası erik-jigeri men danalyǵynyń arqasynda beıbitshilik pen ózara túsinistikke negizdelgen qýatty memleket qurýǵa múmkin boldy. Sondyqtan da, men búgin shyn yqylasymmen Nursultan Ábishulyn álemdik lıderler bolyp tabylatyn Rýzvelt, Cherchıll jáne Den Sıaopınmen qatar atar edim», - dedi Ázerbaıjan Elshisi Beıjińde «Qazaqstan halqy Assambleıasynyń jyly: qoǵamdyq kelisim men ulttyq birliktiń qazaqstandyq úlgisi» taqyrybymen ótken dóńgelek ústel jıynynda.
Eske sala ketsek, elshi Latıf Gandılov ekonomıka ǵylymdarynyń kandıdaty, dıplomatıalyq qyzmetten buryn (1995 jyldary) Baký qalasynda keshendi damý problemalary ǵylymı-zertteý ortalyǵynyń aǵa ǵylymı qyzmetkeri boldy, Polıtehnıkalyq ınstıtýtta dáris berip, saıası ekonomıka kafedrasynyń dosenti bolǵan. 2004-2010 jyldar aralyǵynda Qazaqstandaǵy Ázerbaıjan elshiligin basqardy. 2010 jyldyń mamyr aıynda Qazaqstannyń «Dostyq» ordenimen marapattalǵan.
Beıjińdegi dóńgelek ústeldi Qazaqstannyń Qytaı Halyq Respýblıkasyndaǵy Elshiligi uıymdastyryp otyr. Sharaǵa SHYU Bas hatshysy Dmıtrıı Mezensev, Qytaıdaǵy Elshiler Andreı Denısov (Reseı), Qanaıym Baqtyǵulova (Qyrǵyzstan), Chınar Rýstamova (Túrkimenstan), Latıf Gandılov (Ázerbaıjan), sondaı-aq, tájik, ýkraın, belarýs dıplomattary, Qytaı halyqtyq qoǵamynyń shet memlekettermen dostyq qoǵamy qyzmetkerleri, QHR ulttar isi jónindegi memlekettik komıtetiniń ókilderi, qytaılyq ǵalymdar qatysty.
Aıta keterligi, Qazaqstan halqy Assambleıasy Tóraǵasynyń orynbasary - QR Prezıdenti Ákimshiligi Qazaqstan halqy Assambleıasy hatshylyǵynyń meńgerýshisi Eraly Toǵjan bastaǵan delegasıa quramynda Parlament Májilisiniń depýtattary Zýhra Saıapova men Nadejda Nesterova, «Dunǵan etnomádenı ortalyǵy qaýymdastyǵy» QB basqarma múshesi Shakır Hahazov, «Qazaqstandaǵy uıǵyrlardyń respýblıkalyq mádenı ortalyǵy» QB tóraǵasy Shaımardan Nýrýmov, Qazaqstan halqy Assambleıasy Almaty oblystyq hatshylyǵynyń meńgerýshisi Ǵabıt Tursynbaı, QR Prezıdenti Ákimshiligi QHA hatshylyǵynyń ınspektory Edil Ospan, Syrtqy ister mınıstrligi Syrtqy saıası taldaý jáne boljaýlar departamentiniń keńesshisi Aıda Ermekqalıevalar boldy.
