Búgin Almaty oblysy Úshtóbe qalasynda respýblıkadaǵy sońǵy Keńes Odaǵynyń batyry, Lenın, «Altyn Juldyz» medaldarynyń ıegeri Ivan Vasılevıch Kosenkovty jerleý rásimi ótti. Ol 92 jasynda kóz jumdy. Bul týraly "Qamshy" portaly Qazınform.kzk-ke silteme jasaı otyryp habarlaıdy.

Maıdanger batyrdy sońǵy saparǵa shyǵaryp salýǵa oblys ákimi A. Batalov, óńir basshylyǵy, qoǵam qaıratkerleri, soǵys, eńbek ardagerleri men qalalyqtar jınaldy.

Ivan Vasılevıch Kosenkov uzaq ýaqyttan beri Almaty oblysyndaǵy jalǵyz Keńes Odaǵynyń batyry bolǵan. Qaratal aýdany Úshtóbe qalasynda turǵan.

Batyr 1923 jyly týǵan. Ákesinen erte aıyrylǵan 16 jastaǵy jas jigit kolhozda eńbek etip, otbasyn asyraıdy. 1941 jyly Keńes áskeri qataryna shaqyrtyldy.

Dnepr ózenin kesip ótken kezdegi kórsetken erligi onyń dańqyn shyǵardy. Sol joly artılerıalyq esepte eki adam ǵana qalady, olar - Ivan Kosenkov pen onyń joldasy  Mıhaıl Golákov. Ekeýi bir apta boıy snarádpen úsh tankini, mashınany, bronetransporterdi joıyp, jaýmen keskilesken aıqas júrgizdi. Keıin Zaporojede de osyndaı aıqasta erlik kórsetti.

1944 jylǵy 22 aqpanda onyń dıvızıasyna KSRO Joǵarǵy Keńesi Prezıdıýmynyń jarlyǵy oqyldy: oǵan Dneprdi kesip ótý kezinde nemis-fashıstik basqynshylarmen  aıqasta erlik kórsetkeni úshin Keńes Odaǵynyń batyry ataǵy berildi.