Almatynyń atyshýly baraholkasynan taǵy da shý shyqty. Birazdan beri únsiz jatqan bazar saýdagerleri búgin tańerteń aıqaıǵa basty. Artynan sabyrǵa kelip, Almatynyń jańa ákimin ózderine qonaqqa shaqyrdy. Bul týraly «Qamshy» portaly  nur.kz-ke silteme jasaı otyryp habarlaıdy.

Al Turǵyndardyń saýda jasamaı, bazar men úıleriniń arasynda sandalyp júrgenine bir aıdaı ýaqyt bolypty. Oǵan sebep – polısıa ózderin qaraýyldaýdy kúsheıtken kórinedi.

Tipti “Qulagerdiń” qasynda arnaıy jasaq sarbazdary otyrǵan avtobýs kúni-túni turatyn ádet tapqan. Al keıbiri ózderin, ótken jyly jıi órtengen bazarlardyń burynǵy saýdagerlerimiz dep tanystyrǵan, narazy top, “eń bolmasa, qys túskenshe qalǵan taýarlaryn satyp alýǵa” ruqsat surap otyr.

“Asqana salyp alǵan. Myna jer bolmaıdy, bárimiz nesıe alǵanbyz. Nege mynalarǵa bolady, bolatyn nárse barlyq jerde bolady”, – deıdi saýdager.

Keıbiri,  basqalarǵa berilgen múmkindik – nege ózderine berilmeıtindigine ashýly.

“Qalalyqtyń bári qoıǵan, aınalyp kelgende, osy baraholkany qoımaıdy. On balam bar, kim baǵady ony”, – deıdi saýdager Altyn Jolamanova.

“Áneý kúni osy jerde quladym. 180-men quladym. Ólip ketkende, eshkimniń eshteńekesi ketpeıdi. Densaýlyǵym da joq. Ákimge aıtar sálemim, jaqsylap aıt. 80 adam jylap-eńirep otyr dep. Bizge joldan bermeı-aq qoısyn, ózimizdiń kishkentaı jerimizdi bersin dep”, – deıdi saýdager Aıagóz Imanova.

Saýdagerler, ózderiniń jabaıy saýda ókilderi ekenin jasyrmaıdy. Biraq bul kúıge ótken jyldardaǵy órtterdiń kesirinen tústik deıdi. Aıtýlarynsha, qalanyń burynǵy basshylyǵy, “Ulyger” bazaryn jaýyp jatqan tusta, ózderin ózge bazarlarǵa ornalastyramyz dep ýáde bergen kórinedi.

Alaıda, aıtylǵan sóz – aıtylǵan jerinde qalǵan. Endi, saýdagerler jańa ákimniń qaıyrymynan dámeli, tipti jaǵdaılaryn kórýge qala ákimi ózi kelip ketkenin qalaıdy.

“Ákim, siz “Nur Otannan” kelip otyrsyz. Halyqtyń jaǵdaıyn oılańyzshy, kelińizshi bizdiń bazarǵa. On mınýtyńyzdy qıyp”, – deıdi saýdager Gúlbarshyn Mamyrova.

Biraq bazar ornalasqan Alataý aýdanynyń basshylyǵy bolsa, eshqandaı jabaıy saýdaǵa jol joqtyǵyn shegelep aıtty.

“Bul kisiler osy jerde kóp saýda jasady. Bul kisilerge oryn berdik. Qazir 30-40 adam. Buryn 400-500 adam bolǵan. Solardyń bári oryn aldy. Mine, oryn bar”, – deıdi Alataý aýdany ákiminiń orynbasary Jańabaı Kúlbaev.

Bir kezderi órtengen taýarlarynyń qaldyǵyn áli kúnge saýdalaı almaı júrmiz degen saýdagerler, búgingi aıtylǵan talaptarymyz oryndalmasa, jol jaýyp, ereýilge shyǵamyz deıdi.

Jáne narazylyq sharasyna shyǵar ruqsatty qala ákiminiń ózinen almaq.

 «Qamshy» silteıdi