Qazaqstanda mindetti medısınalyq saqtandyrý júıesiniń engizilýi turǵyndardyń óz densaýlyqtaryna degen jaýapkershiligin arttyra túsedi. Bul týraly Qamshy portaly Qazaqparatqy silteme jasaı otyryp habarlaıdy.
Bul týraly búgin «QazAqparat» tilshisine bergen suhbatynda S. Asfendıarov atyndaǵy Qazaq Ulttyq Medısınalyq Ýnıversıtetiniń rektory, medısına ǵylymdarynyń doktory Aıqan Aqanov málim etti.
«Saqtandyrý medısınasyna ótý - bul elimiz úshin naǵyz tarıhı ýaqıǵa bolady dep sanaımyn. Jańa júıede úsh qatysýshy bolady. Olar: memleket, emdelýshi jáne jumys berýshi. Al búgingi, otandyq densaýlyq saqtaýdyń búdjettik modelinde barlyǵyna jaýapty - memleket. Ol turǵyndardyń qajettiligine de jaýap beredi. Sondaı-aq, jumysshylardyń densaýlyǵyn qorǵaý salasynda jumys berýshiniń saıasatyn da aıqyndap beredi. Mine, osydan baryp densaýlyq saqtaý salasyna turǵyndar tarapynan arqa súıeýshilik-tutynýshylyq, medısınalyq qyzmetkerler tarapynan qazynalyq, al jumys berýshi tarapynan nemquraılyq kózqaras qalyptasady», - dedi A. Aqanov.
Ol sonymen qatar, taıaýda 140 eldiń densaýlyq saqtaý salasyna saraptama júrgizilgendigin aıtty. Saraptama qorytyndysy boıynsha densaýlyq úshin ortaq, yntymaqty jaýapkershilik eń tıimdi júıe ekendigin kórsetken. Osy elderdiń 80 paıyzynda saqtandyrý jáne turǵyndar tarapynan densaýlyq saqtaý qyzmetteri úshin teń tóleý qaǵıdasy qoldanylady. Rektor, jańa densaýlyq saqtaý modelinde osyndaı mindetti medısınalyq saqtandyrý júıesi júzege asyrylatyndyǵyn aıtty.
«Búgingi densaýlyq saqtaý modelin paıdalanyp jatqan memleketterdiń barlyǵy utylyp jatyr. Turǵyndar sapasyz qyzmetter alady, dárigerler men medbıkeler jumystyń sapasyn arttyrýǵa asa yntaly emes. Sóıtip barlyǵyna kináli úkimet bolyp shyǵa keledi. Árıne, elimizdiń áleýeti joǵary. Jańa emhanalar, klınıkalar salynyp jatyr. Búdjetten qomaqty qarjy bólinedi. Degenmen, medısınalyq kómek kórsetýdi uıymdastyrý júıesin ózgertý qajet-aq. Taǵy da qaıtalap aıtam, jańa modelde qatysýshylar úsheý bolady. Olar: densaýlyq saqtaý júıesi, emdelýshi jáne jumys berýshi. Osylaısha densaýlyq saqtaý júıesi jańa sapaǵa kóshedi», - dedi A. Aqanov.
Onyń pikirinshe, jańa júıede dárigerler sapaly medısınalyq kómek kórsetýge yntaly bolady. Jumys berýshiler óz bıznesinde adam kapıtalyn saqtaýǵa jáne nyǵaıtýǵa kúsh salsa, emdelýshiler óz densaýlyǵyna degen jaýapkershiligin arttyra túsedi.
