Almatyda Halyqaralyq «Qazaq tili» qoǵamy janynan «Memlekettik tildi damytý alqasy» qurylady. Bul týraly búgin Almatyda «Dostyq úıinde» ótken «Memlekettik til - meniń tilim» atty saltanatty is-shara barysynda Halyqaralyq «Qazaq tili» qoǵamynyń prezıdenti, akademık Ómirzaq Aıtbaıuly málim etti. Bul týraly "Qamshy" portaly QazAqparatqa silteme jasaı otyryp habarlaıdy.
«Bul alqanyń quramyna Qazaqstan halqy Assambleıasy aıasynda jumys isteıtin ulttyq-mádenı ortalyqtardyń jetekshilerin, memlekettik tilge qatysty uıymdardyń basshylary men osy saladaǵy basqa da eleýli tulǵalardy engizsek degen nıetimiz bar. Sonymen qatar oǵan elimizge belgili qoǵam qaıratkerleri, ǵalymdar, til janashyrlary men ulttyq-mádenı ortalyqtardyń jetekshileri tartylady. Alqa el ishinde memlekettik tildiń órisin keńeıtý, sapasyn arttyrý máseleleri boıynsha tujyrymdar, usynystar, jobalar ázirlep, olardy iske asyrýǵa óz úlesin qosady», - dedi Ó. Aıtbaıuly.
Jıyn barysynda qazaqtar shoǵyrlana qonystanǵan shet elderde jáne baýyrlas túrki memleketteriniń astanalarynda «Qazaq tilin úıretý ortalyqtary jelisin qurý týraly» Memorandýmnyń jobasy qabyldandy. Oǵan til janashyrlary bolyp júrgen otandyq memlekettik, memlekettik emes, qoǵamdyq jáne jeke menshik mekemeler, joǵary oqý oryndary, buqaralyq aqparat quraldary, kitaphana jáne basqa da túrli menshik uıymdarynyń basshylary qol qoıady.
Ómirzaq Aıtbaıulynyń aıtýynsha, bul ortalyqtar shet elderde ómir súretin qandastarymyzdyń arasynda qazaq tiliniń qoldanylar aıasyn keńeıtýge septigin tıgizedi. «Ázirge birinshi ortalyqty osy Halyqaralyq «Qazaq tili» qoǵamynyń janynan quryp alamyz. Keıin birtindep basqa memleketterge shyǵamyz. Bul - ońaı sharýa emes. Aldymen syrtqy ister mınıstrligimen, keıin sol shet elderdegi Qazaqstan elshilikterimen kelisemiz. Atalǵan ortalyqtar shet elderde ómir súretin 5 mıllıon qazaqtyń ana tilinen ajyramaýyn jáne tarıhı otanymen turaqty baılanysyn qamtamasyz etedi», - dedi Ó. Aıtbaıuly.
Jospar boıynsha aldaǵy ýaqytta barlyǵy 50 ortalyqty ashý kózdelýde. Aıta ketelik, búgingi saltanatty is-shara barysynda Qazaqstanda ómir súretin ózge ulttardyń ónerpaz jastarynyń oryndaýynda qazaqtyń birqatar tanymal ánderi shyrqaldy.
Jıyn óz jumysyn aıaqtady.
