"Kazakhstan Rubber Resycling" mekemesi Qazaqstannyń ınvestısıalyq qorynyń qoldaýymen kásibin qaıta dóńgeletti. Óńdelgen qaldyq qaı jerlerde qoldanylady? Qaldyqtar qaraýsyz qalmaıdy. Bul týraly "Qamshy" portaly Baq.kz -ke silteme jasaı otyryp habarlaıdy.
Avtomobıldiń mynadaı jaramsyz shınalary endi kádege aspaq. Astanada 2010 jyly ashylǵan bul zaýyt qarjy qolbaılaý bolyp, jumysy toqtaǵan. Osy kúzden bastap turalaǵan kásiporyn qyzmeti qaıta jandandy. Qazaqstannyń damý banki bul kásiporynǵa 6,8 mln dollar bólip, tynysyn ashty. Qaryz qamytyn kıip, tyǵyryqqa tirelmeý úshin bank jaıly jaǵdaı jasaǵan. Nátıjesinde 3 jyl boıy shań basyp turǵan apparattarǵa jan bitip, qan júgirip, qaıta iske qosyldy.
Aıan Esjanov,«Qazaqstannyń ınvestısıalyq qory» AQ ınvestısıalyq jobalar departamentiniń dırektory:
- Bul mekemeniń nesıeni tóleýge múmkindigi bolmady. Qazaqstannyń ınvestısıalyq qory óz qol ushyn berdi. Bul joba Astananyń ekologıalyq jaǵdaıyn jaqsartýǵa úlken úlesin qosady degen senimdemiz.
At shaptyrym aýmaqtyń 9 myń sharshy metr alańyn alyp turǵan mekeme jylyna 30 myń tonna shına óńdeýge qaýqarly. Ázirge zaýyt jumysyna 30 adam tartylǵan.
Ermek Abdıev Kazakhstan Rubber Resycling zaýytynyń dırektory:
- Naýryzdan bastap synaq jumystaryn júrgizgenbiz. Elorda tóńireginen jınalǵan myń tonnadaı shınany óńdedik. Qazir zaýyt tolyqtaı óz qyzmetine kiristi. Bul jobanyń quny 10 mln dollardan asady.
Qaldyq untaǵynan balalar men sport alańyna tósenishter ázirlenedi. Bastysy – bala ómirine qaýipsiz. Ańsat Isataı zaýytpen kelisim-shart jasasqan kásipkerlerdiń biri. Aldaǵy ýaqytta 3D oıynshyqtardy shyǵarýdy josparlaýda.
Ańsat Isataı kásipker:
- Qazir neshe túrli gıpsten jasalǵan oıynshyqtar qoıylyp jatyr. Biraq, olardyń bári qaýipsiz emes balalarǵa. Ázirshe bundaı joba joq, Qudaı qalasa kelesi jyldan bastap, biz anyq osyny bastaımyz dep josparlap otyrmyz.
Astanada jylyna 480 myńdaı jaramyz shına qoqysqa tastalady. Qaldyqty qaraýsyz qaldyrý ekologıaǵa kesirin tıgizeri anyq. Sondyqtan zaýyt qala turǵyndaryn jaramsyz shınany mekemelerine ótkizip, shahar tazalyǵyna óz úlesin qosýǵa úndep otyr.
