Qyrkúıektiń 21-22 kúnderi «QTJ» UK» AQ-nyń prezıdenti Asqar Mamın bastaǵan delegasıasy Lánúngan (QHR) qalasyndaǵy «Qytaı-Jibek Joly» ekinshi halyqaralyq kórmesine qatysty. Forýmǵa Qytaı, Japonıa, Ońtústik Koreıa, Qazaqstan, Taıvan, eýropalyq elderdiń 200-den astam logıstıkalyq jáne teńiz keme kompanıalary qatysty, - dep habarlaıdy «QTJ» UK» AQ baspasóz qyzmeti. Bul týraly "Qamshy" portaly Baq.kz-ke silteme jasaı otyryp habarlaıdy.
Kórmede «QTJ» UK» AQ basshysy Qazaqstannyń tranzıttik áleýeti týraly baıandama jasady. Baıandama barysynda Qazaqstannyń «Nurly jol» jańa ekonomıkalyq saıasaty aıasyndaǵy Qytaı Halyq Respýblıkasymen sınergıalyq «Bir beldeý- bir jol» baǵdarlamasyn úılestirý jaıy aıtyldy. Sondaı-aq, 2015 jylǵy segiz aıda Qytaı-Eýropa-Qytaı baǵdaryndaǵy konteınerlik poıyzdardyń 2014 jylmen salystyrǵanda 105 konteınerlik poıyzdan 291-ge artqandyǵy atalyp ótildi. «Lánúngan qalasyndaǵy qazaqstan –qytaı halyqaralyq logıstıkalyq kompanıasy» 14 aıda 150 myń konteınerdi óńdegen. Bul kórsetkishti 2020 jyldarǵa qaraı 500 myń konteınerge jetkizý josparlanyp otyr.
Sapar barysynda Szánsý provınsıasynyń gýbernatory Lú Súeıýn men Lánúngan qalasynyń meri Chjao Sáoszánmen ekijaqty kezdesýler ótkizildi. Kezdesýler barysynda 2015 jylǵy tamyzdyń 31-indegi Qazaqstan Respýblıkasy Prezıdentiniń QHR-ǵa sapary barysynda qol qoıylǵan «Qorǵas-SHyǵys qaqpasy» AEA damytýǵa arnalǵan ınvestısıalyq 600 mln. AQSH dollary kólemindegi qarjyny ıgerý jaıy saraptaldy. Onyń syrtynda «Lánúngan qalasyndaǵy qazaqstan-qytaı halyqaralyq birlesken logıstıkalyq kompanıasyn» odan ári damytý men Lánúngan porty mańyndaǵy Shańhaı Yntymaqtastyǵy Uıymyna qatysýshy memleketterdiń logıstıkalyq parkiniń tehnıkalyq-ekonomıkalyq dáıektemesin jasaý jaıy qarastyryldy.
Aıta keteıik, Szánsý provınsıasy ishki jalpy ónimi jylyna 1,2 trıllıon dollardy quraıtyn 78 mıllıon turǵyny bar damyǵan óńir. Lánúngan porty Qytaıdyń serpindi damyp kele jatqan jylyna 200 mıllıon tonna júk óńdeıtin porty sanalady. Lánúngan qalasynda 5 mıllıon halyq turady.
