«Baspanaly bolsam» dep talaptan­ǵandarǵa qazirgi tańda jaqsy múmkin­dikter bar. Túrli memlekettik baǵdar­lamalar boıynsha tizimge turyp, úıli bo­lyp jatqandardyń qatary qazir kóbeıdi. Bul týraly Qamshy portaly Aıqyn-aqparatqa silteme jasaı otyryp habarlaıdy.

Óz betinshe jer telimin alyp úı turǵyzýǵa talaptanyp jatqandar da az emes. Qurylys qarqyn alý úshin eń basty qajettiliktiń biri – túrli qu­rylys materıaldary. Dollardyń teń­gege qatysty baǵamy qubylýynyń bul salaǵa da keri áseri tıgeni ras. Degen­-men, baspana turǵyzýǵa shyndap bet bur­ǵan­dar «Muny ýaqytsha qıyndyq» dep uǵynyp, bastaǵan isterin ármen qa­raı jalǵastyrýda. 

Elbasy Nursultan Nazarbaev ta «Nur­ly jol» baǵdarlamasynda qu­ry­lys materıaldaryn óndirýde otandyq kásiporyndardyń úlken múmkindigi baryn aıtyp ótken. Tipti qazaqstandyq kompanıalardyń «EKSPO – 2017» kórmesi qurylysy nysandaryna bel­sene qatysýy kerektigin de eskertken. 
Qazir elimizdiń qurylys ındýstrıa­sy salasynda 700-ge tarta óndiris oryn­dary jumys istep keledi. Olardyń qa­tary jyl ótken saıyn artýda. De­genmen, mamandar olardyń kóbi búginde tek qu­rylys materıaldaryn óndirýmen ǵana shektelip otyrǵanyn aıtady. 
Otandyq qurylys materıaldary­men qamtamasyz etý úlesinde ósim bar. Bir ǵana sement óndirý boıynsha elimiz sońǵy úsh jylda ımport kólemin 1 mıl­lıon tonnaǵa deıin tómendetken. Iaǵnı syrttan sement tasý azaıyp, kerisinshe otan­dyq ónimdi tutyný arta túsken. Investısıa jáne damý mınıstrligi In­dýstrıaldyq damý jáne ónerkásiptik qaýipsizdik komıteti tóraǵasynyń orynbasary Tımýr Nurashev «Eger qurylys materıaldary ónerkásibi týraly, onyń ishinde sement óndirisi jaıly aıtar bolsaq, onda 2013 jyly 7 mıllıon tonna, al 2014 jyly 7,9 mıl­lıon tonna sement óndirgenbiz. Bıyl 8 mıllıon tonnadan astam sement ón­dirýdi josparlap otyrmyz» deıdi. Qu­ry­lys salasyndaǵy negizgi materıal bolyp sanalatyn sement óndirýdiń óz elimizde qarqyn alýy qýantady. Resmı ókildiń iri kásiporyndarmen otandyq qurylys materıalyn paıdalaný jó­ninde kelisim jasalǵanyn aıtqany da kóńilimizden shyǵyp tur. Óıtkeni bul da bolsa otandyq óndirisshilerdi qol­daýdyń bir amaly ekeni ras. «Eger qu­rylys jaıynda aıtar bolsaq, bizde óte aýqymdy «Nurly jol», «Aımaqtardy damytý – 2020» baǵdarlamalary, «EKSPO – 2017» qurylys nysanda­ryna óz qurylys materıaldarymyzdy jetkizý maqsatynda jumystar jasap jatyr­myz. Mysaly, «Nurly jol» baǵdarla­masy boıynsha joldarǵa óz elimizde óndirilgen 500 tonna sementti, sonymen qatar 130 tonna bıtýmdy paıdala­ný­dy usynyp otyrmyz» deıdi Tımýr Nu­rashev myrza. Bul da quptar­lyq is. 
Rasymen de, keıingi jyldary otan­dyq qurylys materıaldarynyń túri de kóbeıip, sonymen qatar onyń sapasy da jaqsaryp keledi. Sapasyna mán ber­mese naryqta oıynnan shyǵyp qala­ty­nyn búginde óndirisshiler tolyǵymen túsingen. Básekege saı bolmasa ónimdi ótkizý qıyn ekeni aıdan anyq. Onyń ústine ózge eldiń antalaǵan taýar óndi­rý­shileri ishki naryqtaǵy bos keńistikti bile qoıady. Óıtkeni tutynýshy sura­nysyn qanaǵattandyrý óndirýshiniń basty qaǵıdasy. 
Inovasıa jáne damý mınıstr­liginiń málimetine qaraǵanda, elimizde sońǵy bes jylda 13 úı qurylysy kom­bınaty paıdalanýǵa berilgen. Óner­kásip oryndary 11 oblys pen Astanada ornalasqan. Kombınattar «Qazaqstan­nyń ındýstrıaldyq damý baǵdarla­-masy sheńberinde iske qosylǵan. Jyl saıyn bul ónerkásip oryndarynda myń­daǵan sharshy metr qurylys bu­ıymdary óndiriledi. Budan basqa 2010-2014 jyldary bes sement zaýyty iske qosylǵan. Olar elimizdiń sement ón­dirisine ózindik úlesin qosyp keledi.
Keıingi jyldary otandyq qurylys salasynda metal jabyndylary, plas­tıkalyq tereze men esikter jasaý júıe­li jolǵa qoıylǵan. Qurylys ma­terıaldaryn óndirýge qulshynys ta­nytýdyń alǵashqy oń nátıjeleri qa­zirdiń ózinde biline bastady. Qazir se­ment, beton buıymdaryn, jylý saqta­ǵysh materıaldar men plasmassa qu­byrlardy óndirýde jergilikti ónerká­sip oryndary sheteldik áriptesteri­nen qalysar emes. Máselen, 2010 jyly bar bolǵany 4,7 mıllıon tonna sement óndirilse, 2014 jyly bul san 7,9 mıl­lıon tonnaǵa jetip jyǵylǵan. Bıyl osydan bes jyl burynǵy kórsetkishti eki eseleýge jospar jasalǵan. Júıeli, josparly jumys qashanda oń nátı­jesin beretinine taǵy da kóz jetkizip otyrmyz.