Búgin Almatyǵa Gádımınas atyndaǵy Vılnús tehnıkalyq ýnıversıtetiniń (Lıtva) delegasıasy keldi. Lıtva Respýblıkasynyń Almatydaǵy Bas konsýly  Regımantas Iablonkas bastaǵan lıtvalyq qonaqtar Q. Sátbaev atyndaǵy Qazaq ulttyq tehnıkalyq zertteý ýnıversıtetiniń basshylyǵymen kezdesti. Bul týraly Qamshy portaly QazAqparatqa silteme jasaı otyryp habarlaıdy.

Kezdesý barysynda QazUTZÝ ýákiletti tulǵasy Ábdikárim Zeınýllın jáne ýnıversıtettiń ǵylymı jáne ınovasıalyq jumystar boıynsha prorektory Erjan Kúldeev lıtvalyq delegasıamen ekijaqty yntymaqtastyq ornatý máselelerin talqylady.

Á. Zeınýllın Qazaqstannyń iri joǵary oqý ornynyń Baltyq jaǵalaýy elderiniń joǵary oqý oryndarymen baılanys ornatý mańyzdy qadam ekendigin aıtty. Basqosý barysynda eki tarap kólik, qurylys, aqparattyq tehnologıa, mehanıka jáne sáýlet salalarynda ózara yntymaqtastyqty damytýǵa múddeli ekendikterin bildirdi.

Al Vılnús ýnıversıtetiniń halyqaralyq yntymaqtastyq jónindegi departamentiniń dırektory Bırýta Tamýlaıtıene hanym ekijaqty yntymaqtastyqty aldaǵy ýaqytta belsendi dárejede júrgizý kerektigin basa aıtty.

Aıta ketelik, Gádımınas atyndaǵy Vılnús tehnıkalyq ýnıversıteti Lıtvanyń memlekettik joǵary oqý orny. Injenerlik-tehnıkalyq bilim berý jáne ǵylymı zertteýler salasynda eldegi aldyńǵy qatarly ýnıversıtetterdiń biri.