Aqtóbe oblysynyń ákimi Berdibek Saparbaev kásipkerlermen, sheteldik ınvestorlarmen kezdesti. Jıyn kezinde jumys ornyn saqtap, jalaqyny ýaqytyly tóleýdi tapsyrdy. Bul týraly Qamshy portaly Bnews.kz -ke silteme jasaı otyryp habarlaıdy.  

Basqosýda kásipkerlerdiń ǵana emes, qarapaıym jumysshylardyń erteńgi ómiri sóz boldy. Sebebi, jumysshylaryna ýaqytyly eńbekaqy tóleı almaı otyrǵandar men reti kelse qol astyndaǵy qyzmetkerler sanyn qysqartýǵa daıyn turatyn kásipkerler keldi. Buǵan deıin 200-den astam adamdy jumystan bosatqan «Uly Qabyrǵa» JSHS-i búgin taǵy 295 adamdy qysqartýǵa sheshim qabyldaǵanyn habarlady. «Qazan aıynda qysqartamyz» dep kesip aıtqan basshy oblys ákiminiń «jumysshylar qaıda barady», «olardyń erteńgi ómiri ne bolady» degen suraǵyna múlde jaýap bere almady. Tipti, jeke kabınette aıtamyn dep qaıta-qaıta týra jaýaptan jaltardy. «Qytaıda kelisim shartty oryndamaǵan adamdarǵa qandaı jaza bolatynyn bilesiń be?»,- degen óńir basshysy jumysshylardyń ómirin oılaýdy tapsyrdy.

«SNPS-Aqtóbemunaıgaz» AQ-nyń bas dırektory bul jıynǵa kelmedi. Esesine damý men atqarylyp jatqan ister jaıyn bas dırektordyń orynbasary Taqtalıfým Esenǵulov baıandady. Onyń aıtýynsha, qazir bul iri kompanıada 6600-den astam jumysshy bar. Onyń 115-i qytaılyq maman. Bıyl munaı óndirý kólemi azaıǵanymen, gaz óndirý 1 mıllıard tekshe metrge deıin artqan. Bul kompanıada qazaqstandyq úles – 30 paıyz.

«Qazaqstandyq úlesti arttyrý kerek. Shaǵyn jáne orta bıznesti damytýǵa sol kezde kompanıa septigin tıgizedi. 30 paıyz degen óte az. Al qazirgi munaı baǵasy qansha?»,- dedi oblys ákimi.

Biraq bul suraqqa bas dırektordyń orynbasary Taqtalıfým Esenǵulov jaýap bere almady.

«Munaı baǵasy tómendegendikten óndiristiń jaǵdaıy qıyn degen bos sóz. Menedjmenti jaqsy kompanıa munaıdyń barreli 30 dollarǵa tússe de paıda taba alady. Al bizdiń kásipkerler úshin munaı quny 60-70 dollardan túspeýi qajet. Bul bolmaıdy. Jumysty uıymdastyrý, bıylǵy jyldy emes, keler jylǵa da úlken senimmen kirý joldaryn qarastyramyz»,- dedi óńir basshysy. Bul barlyq kásipkerge aıtylǵan ortaq tapsyrma. Turalap qalmaı, ótken jylǵy mejege jetýdi mindettedi.

Munan ózge jıynda oblys ákiminiń orynbasary Ǵalı Esqalıev baıandama jasady. Qazir óńirde taý-ken, munaı, metalýgıa óndirý salasynda qıyndyqtar bar. «Taý-ken, hrom, mys, temir óndirisi azaıdy. Gaz óndirisi de 45 paıyzǵa tómendedi. «SNPS-Aqtóbemunaıgaz» AQ men «Qazahoıl» JSHS-i munaı óndirisi baıaýlatty. Temir óndirisi 20 paıyzǵa tómendedi. Munaı burǵylaý jumystaryn «Uly Qabyrǵa», «Vostok neft», «Senapek» JSHS-i azaıtty. Munyń bári óńirdiń damýyn tejep tur. Biraq biz Údemeli ındýstrıaldy ınovasıalyq damý baǵdarlamalary arqyly 2014 jylǵy mejeni saqtap qalamyz. Ásirese, Aqtóbe rels-arqalyq zaýyty men Aqtóbe feroqorytpa zaýytynyń iske qosylýy ekonomıkanyń ósýine jaqsy áser etip otyr»,- dedi ol.

Al oblys ákiminiń orynbasary Sara Nurqatova óńirdegi jumyssyzdyq pen qysqartýlar, kásipkerlerdiń berejaǵy jaıyn habarlady. Bıyl jyl basynan beri 1800-den astam adam jumyssyz qalǵan. Al kásipkerlerdiń qaryzy 62 mıllıon teńgeden asty. Ásirese, munaı kompanıalarynyń jaǵdaıy qıyn. Olar tipti, úshjaqty memorandýmdy oryndaı almaı otyr. Aıta keteıik, jumysshyny qysqartýǵa bel býǵan kompanıa eki aı buryn ákimdikke habarlaýy tıis. Sebebi, jumyssyz qalǵan adamdardy memlekettik baǵdarlamalar arqyly qaıta oqytý, kómek berý tetikteri qarastyrylady.