Qazaqstanda Jalpyulttyq ınovasıalar baıqaýy bastaldy. Bul týraly búgin Ortalyq komýnıkasıalar qyzmetindegi baspasóz qyzmetinde málim boldy. Bul týraly Qamshy portaly QazAqparatqa silteme jasaı otyryp habarlaıdy.

Atap aıtqanda, Investısıalar jáne damý mınıstrligi baıqaýdy bes atalym boıynsha ótkizý sheshimin qabyldady. Búginnen bastalǵan osy baıqaý «Oqýshylar arasyndaǵy úzdik joba», «Úzdik jas ǵalym», «Jyldyń úzdik ónertapqyshtyq sheshimi», «Kásiporynda ónertapqyshtyqty qoldaýdyń úzdik júıesi», «Inovasıalyq taqyryptaǵy úzdik tilshi materıaly» atalymdary aıasynda uıymdastyrylady.

«Tehnologıalyq damý jónindegi ulttyq agenttik» AQ basqarmasy tóraǵasynyń orynbasary Jumataı Sálimovtiń sózine qaraǵanda, Qazaqstandaǵy Brıtandyq keńespen birge balalardyń úzdik ınovasıalyq jobalary iriktelinedi. Sonymen qatar atalǵan keńestiń qoldaýymen  Londondaǵy FameLab baıqaýynyń grand fınalynda elimizdiń namysyn qorǵaıtyn úzdik jas ǵalym anyqtalady.

Sonymen, «Oqýshylar arasyndaǵy úzdik joba» atalymyna orta mektepterdiń 5-11 synyp oqýshylary men kolejderdiń 1 jáne 2 kýrs stýdentteri qatysa alady. Ótinimderdi qabyldaý 22 qarashaǵa deıin jalǵasady, al baıqaýdyń aqtyq syny Astanada 11 jeltoqsanda ótkiziledi. Jeńimpazdar men júldegerler Ulybrıtanıaǵa bilimderin jetildirý saparymen barady.

«Úzdik jas ǵalym» atalymynda jeńimpaz dep tanylǵan 7 500 000 teńgeni quraıtyn bas júldeni alatyn bolady, sondaı-aq  2-shi men 3-shi oryndy ıelengenderge, sáıkesinshe, 2 500 000 jáne 1 500 000 teńge tapsyralady. Munymen qosa júlde qoryna Ulybrıtanıaǵa barý úshin vızalyq qoldaý kórsetý úshin jáne ushyp barý jolaqysy kiredi. Baıqaýdyń fınaly elordada 11 qarashada ótedi.

Budan bólek, «Jyldyń úzdik ónertapqyshtyq sheshimi» atylymynda birinshi orynǵa - 2 500 000 teńge, ekinshi orynǵa - 1 500 000 teńge, al úshinshi orynǵa - 1 000 000 teńge kóleminde júlde qory qarastyrylǵan.

BAQ ókilderi arasynda ınovasıa taqyrybyndaǵy úzdik materıaldar «Merzimdik basylymdaǵy úzdik materıal», «Úzdik radıobaǵdarlama», «Úzdik televızıalyq sújet», «Úzdik ınternet-materıal/úzdik bloger» atalymdary aıasynda iriktelinedi. Qatysýǵa ótinimder qabyldaý 25 qazanǵa deıin jalǵasady. Bas júldeni ıelengen jýrnalıske 1 mln. teńge tapsyrylady.

Qatysýshylardyń ótinimderi «TDUA» AQ-nyń (natd.gov.kz) resmı saıtyna  onlaın qabyldanady.