Aqmola oblysynda halyqaralyq týrızm kúnine arnalǵan oblystyq «Kúzgi japyraqtyń túsýi» týrısik sleti máresine jetti.
Bul týraly Qamshy portaly «Aqmola Medıa ortalyǵyna» silteme jasaı otyryp habarlaıdy.
Zerendi aýdanynyń Sadovoe aýylyndaǵy «Oblystyq balalar men jasóspirimder týrızmi, ólketaný jáne ekologıa ortalyǵy» memlekettik mekemesiniń aýmaǵynda ótken jarysqa Atbasar, Aqkól, Býrabaı, Esil, Jaqsy, Bulandy, Zerendi, Sandyqtaý aýdandarynan, Kókshetaý qalasy jáne Soltústik Qazaqstan oblystarynan kelgen barlyǵy 18 komanda qatysty.
«Qatarynan úsh kún boıy ótken sharanyń maqsaty - óńirde týrızmdi nasıhattap, osy baǵytta tájirıbe almasý, sondaı-aq osyndaı respýblıkalyq jarystarǵa qatysatyn týrısik kópsaıystan oblystyń myqty komandalaryn anyqtaý bolyp tabylady», - deıdi uıymdastyrýshylar.
Jarys qorytyndysyna saı, 1998 jyly týylǵandar jáne odan joǵary toptaǵylar arasynda 1 oryndy Soltústik Qazaqstan oblysynan kelgen Petropavl qalasynyń komandasyna buıyrsa, júldeli 2 orynǵa oblystyq balalar men jasóspirimder týrızmi, ólketaný jáne ekologıa ortalyǵynyń «Fırn» komandasy laıyq dep tanyldy. Al, 3 oryndy Býrabaı aýdanynyń týrızm jáne servıs ındýstrıasy koleji komandasy mise tutty.
Sonymen qatar 1998 -2001 jylǵy týylǵandar arasyndaǵy topta 1 orynǵa Sandyqtaý aýdanynyń komandasy kóterilse, 2 oryn Soltústik Qazaqstan oblysynan kelgen Petropavl, al 3 oryn Shýchedegi «Arman» TJO komandalaryna buıyrdy.
Al, sońǵy 2002-2004 jyly týylǵandar tobynda 1 oryndy oblystyq balalar men jasóspirimder týrızmi, ólketaný jáne ekologıa ortalyǵynyń komandasy jeńip aldy , ekinshi jáne úshinshi oryndardy Petropavl jáne Kókshetaý qalalarynyń komandalary ózara bólisti.
Jarys sońynda jeńimpaz komandalardyń barlyǵyna baǵaly syılyqtar men marapattar tapsyryldy. Jeńimpazdar respýblıkalyq jarysta Aqmola oblysynyń namysyn qorǵaıtyn bolady.
