Almaty qalasynda 2015 jyldyń qarasha aıynda 2017 jylǵy qysqy Ýnıversıada oıyndaryna qatysty Qoǵamdyq keńes qurylatyn bolady. Bul týraly búgin «Almaty qalasynyń halyqaralyq sport jobalary dıreksıasy» Memlekettik qorynyń baspasóz qyzmetinen habarlady. 

«2015 jyldyń qarasha aıynda «Almaty qalasynyń halyqaralyq sport jobalary dıreksıasy» Memlekettik qory 2017 jyly bolatyn qysqy Ýnıversıada oıyndaryna daıyndalý jáne ony ótkizý boıynsha Qoǵamdyq keńes qurady», - delingen habarlamada. 
Bul uıymnyń aldyna qoǵammen ózara árekettesý, belsendi azamattardyń bastamalaryn qaraý, sondaı-aq jobanyń qurylymy men daıyndyq barysy týraly azamattar aldynda esep berý mindeti qoıylady. 

«Ýnıversıada sekildi iri jobalarda Qoǵamdyq keńes kerek. Olardyń quramyna belsendi azamattyq ustanymy bar turǵyndar, jas bloggerler, jastar uıymdarynyń ókilderi, sport ardagerleri jáne basqa da azamattardy engizýge bolady. Birinshi kezekte, biz osyndaı qoǵamdyq toptyń arqasynda aqparat jáne pikir almasa alamyz Al qoǵamdyq belsendi azamattar óz usynystaryn engizetin bolady», - dep túsindirdi Ilá Orazaqov. 

Odan basqa, mundaı keńes osyndaı iri jobaǵa daıyndyq úderisiniń qarjylyq ashyqtyǵyn qoǵamǵa pash ete otyryp, memlekettik organdar men halyq arasyndaǵy baılanysty nyǵaıta túspek. Qoǵamdyq keńestiń quramynda kem degende 15 adam bolady. Ilá Orazaqovtyń pikirinshe, onyń músheleri sport salasyn jaqsy bilýleri tıis jáne mundaı jobalardyń qalaı júzege asatyndyǵyn túsine otyryp, oryndy usynystardy ortaǵa salýlary kerek. 

Úmitkerlerge daýys berý sharasy aldaǵy qazan aıynda almaty2017.com saıtynda júrgiziledi. Árbir azamat ózin nemese basqa azamatty usyna alady. 

«Kóp daýysqa ıe bolǵan adam, Qoǵamdyq keńestiń quramyna enedi», - dedi I. Orazaqov. Aıta ketelik, Keńes músheleriniń Ýnıversıadaǵa daıyndyq jumystaryna qatysty sheshim qabyldaý jumystaryna tikeleı qatysýǵa, Dıreksıa tarapynan qajetti qujattarǵa qol jetkizýge jáne jobanyń shyǵyndaryna qatysty tolyq esep alýǵa múmkindik alady.