«Ýnıversıada-2017» nysandarynyń qurylys barysynda memleket qazynasyna 12,4 mlrd teńge kóleminde salyq túsimi túsedi. Bul týraly Almaty ákimi Baýyrjan Baıbek FISU stýdenttik sport halyqaralyq federasıasynyń bas hatshysy Erık Saıntrondty qabyldaý kezinde aıtty. Bul týraly Qamshy portaly Igform.kz-ke silteme jasaı otyryp habarlaıdy.

Kezdesý barysynda atqarylǵan jumys jaıly baıandama tyńdalyp, bolashaqta júzege asatyn josparǵa birshama ózgerister engizildi. 
Qala ákimi «Ýnıversıada-2017» jobasy qalanyń áleýmettik-ekonomıkalyq damýyna tyń serpin beretinin jetkizdi. 

«Ýnıversıada nysandarynyń qurylysynda qazaqstandyq qamtý 51-52 paıyzdy qurap otyr. Ár nysanda 500-den astam otandyq kásiporyn eńbek etýde. Qurylys materıaldarynyń da basym kópshiligi qazaqstandyq. Qurylys barysynda el qazynasyna 12,4 mlrd teńge salyq túsimi túsedi. Sondaı-aq, 12,5 myń jumys orny ashylady», - dedi B.Baıbek.

Sondaı-aq, nysandardyń áleýmettik júktemelerin arttyrý týraly sheshim qabyldandy. Aıtalyq, atletıkalyq aýylda 5 myń stýdentti ornalastyrý kózdelip kelgen bolsa, endi 10 myńnan asa stýdentti syıǵyzý josparlanyp otyr. 

Qala ákimi atletıkalyq aýyldyń aýqymdy stýdenttik keshenge aınaldyrýdyń mańyzdylyǵyn eskertti. «Muz aıdyny arenasymen qosa qala turǵyndarynyń belsendi demalatyn ornyna aınalatyn bolady. Búginde ákimdik qurylys júumystarynyń sapaly ári kestege saı júrýine basa mán berip otyr», - dedi ákim. 

Óz kezeginde E.Saıntrond jańa ákimdi laýazymymen quttyqtap, FISU tarapynan daıyndyqqa jan-jaqty kómek kórsetiletinin jetkizdi. 
Qonaqtar stýdenttik keshenniń JOO qaramaǵyna ótetinine erekshe qýanysh bildirdi. 

Aıta ketý kerek, Almatyǵa 9-14 qazan aralyǵynda FISU tehnıkalyq komısıasynyń delegasıasy keledi. 14 adamnan turatyn delegasıa ýnıversıada nysandarynyń daıyndyq dárejesin tekseretin bolady.