Qazaqstan Prezıdenti bul sapary BUU Bas hatshysy Pan Gı Mýnnyń shaqyrýymen mereıtoılyq sesıaǵa qatysý úshin jasalǵanyn atap ótti. Bul týraly Qamshy portaly akorda.kz-ke silteme jasaı otyryp habarlaıdy.
Men Bas assambleıanyń jalpy debatynda elimizdiń jahandyq saıası jáne ekonomıkalyq máselelerge qatysty kózqarasyn ortaǵa saldym. Sonymen qatar taǵy eki samıtke – 2015 jyldan keıingi damý kezeńiniń kún tártibin qabyldaý jónindegi jáne zorlyq-zombylyq sıpatyndaǵy ekstremızmge qarsy kúres jónindegi samıtterge qatystym. Sondaı-aq birqatar memleketter men úkimetterdiń basshylarymen kezdesýdiń múmkindigi týdy. Munyń bári Qazaqstan úshin mańyzdy, elimizdiń pikirin jahandyq qoǵamdastyq estidi, – dedi Memleket basshysy.
Nursultan Nazarbaev ózi kótergen negizgi máselelerge de toqtaldy.
Birinshi kezekte, men BUU Ekonomıkalyq jáne Áleýmettik keńesterin Jahandyq damý keńesine aınaldyrýdy usyndym. Kelesi másele – ıadrolyq qarýdy taratpaý. Qazaqstan bul baǵytta jetekshi ári belsendi ról atqarady. Bul rette álem qoǵamdastyǵynyń qatysýymen ilgeri jyljý kerek, adamzat HHİ ǵasyrda jappaı qyryp-joıý qarýynan bas tartýy tıis. Ekstremızmge qarsy is-qımylǵa kelsek, ony bizdiń el de sezinip otyr, osyndaı keıbir toptardyń qatarynda Qazaqstannan tartylǵan jastar da bar. Jalpy, 2001 jylǵy 11 qyrkúıekten keıin bolǵan birliktiń mańyzdylyǵy atap ótildi. Men sondaı-aq tıisinshe qoldaý bolatynyna úmittene otyryp, qatysýshylardyń nazaryn Aral teńiziniń, Semeı polıgonynyń problemalaryna aýdardym, – dedi Qazaqstan Prezıdenti.
Memleket basshysynyń aıtýynsha, adamzat 2045 jylǵa qaraı barlyq negizgi máselelerdi, ásirese qaqtyǵys oshaqtaryndaǵy problemalardy sheshýi tıis.
Jer betindegi kedeıshilik deńgeıi óte joǵary, mıllıardqa tarta halyq toıa tamaq ishpeıdi, mıllıondaǵan adam saýatsyz, balalar arasyndaǵy ólim-jitim jyl saıyn 40 mıllıondy quraıdy. Baı elder kedeılerge kómektesýi tıis. Osyǵan baılanysty men barlyq memleketterdiń áskerı shyǵystarynyń 1 paıyzyn Myńjyldyq maqsattaryn júzege asyrý isine bólýdi usyndym, bul zor kómek bolar edi. Bizdiń elimiz kótergen barlyq máseleler tıisti qoldaý tapty dep esepteımin, – dedi Nursultan Nazarbaev.
Memleket basshysy BUU shtab-páterin ornalastyratyn oryn taǵy bir taqyryp retinde qozǵalǵanyn aıtty.
1945 jyly Uıymdy Nú-Iorkke kóshirý týraly sheshim qabyldandy. Sodan beri 70 jyl ótti, álem ózgerdi. Búginde Azıanyń qarqyndy damýy baıqalyp otyr. Sondyqtan BUU qyzmetin jańartý jáne jandandyrý maqsatynda onyń shtab-páterin Azıa qurlyǵyna kóshirý týraly usynys aıttym, – dedi Qazaqstan Prezıdenti.
Nursultan Nazarbaev BUU Bas assambleıasynyń minberinen elimizdiń memlekettik tilinde alǵash ret sóz sóılengenine toqtaldy.
Meniń memlekettik tildegi sózim, onyń Uıymdaǵy barlyq resmı alty tilge ilespe aýdarylýy da jaqsy nyshan boldy, – dedi Memleket basshysy.
Sonymen qatar Nursultan Nazarbaev AQSH Prezıdenti B.Obamen kelissózder barysynda ekijaqty yntymaqtastyqty damytý máseleleri talqylanǵanyn aıtty. Atap aıtqanda, Qazaqstanǵa AQSH Memlekettik hatshysy D.Kerrıdiń kelýi josparlanýda.
B.Obamen barlyq jeti jyl boıynda ótken dıalog jemisti boldy. AQSH bizdiń respýblıkamyzdyń DSU-ǵa kirýine atsalysty, barlyq bastamalarymyzdy árdaıym qoldap keledi. Qazaqstanda 500-ge jýyq amerıkalyq kompanıa jumys isteıdi, AQSH-tyń tikeleı ınvestısıalarynyń kólemi 30 mıllıard dollardyń shamasynda. Men bizdiń elimiz óz talpynystary men ekonomıkalyq baǵdarlamalary AQSH tarapynan qoldaý tabady dep senetinin atap óttim, – dedi Memleket basshysy.
Qazaqstan Prezıdenti sondaı-aq Reseı Prezıdenti V.Pýtın men AQSH Prezıdenti B.Obamanyń kezdesýine qanaǵattanýshylyq bildirdi. Bul kezdesý eki eldiń arasyndaǵy qarym-qatynastardy jolǵa qoıýǵa septigin tıgizedi.
Memleket basshysy Amerıka isker toptarynyń iri ókilderimen bolǵan kezdesýdiń mańyzdylyǵyn aıtty.
«Bıznes kapıtandary» aktıvteriniń jıyntyq quny 10 trıllıon dollardy quraıdy. Kezdesýdi ótkizgen moderator aıtqandaı, memleket basshylary buǵan deıin bıznesmenderdiń osynshalyq kóp quramymen kezdespegen. Kezdesý barysynda elimizde júzege asyrylyp jatqan jobalar týraly aıtyp, olardy «Nurly jol», ÚIIDB sıaqty baǵdarlamalarǵa qatysýǵa shaqyrýǵa múmkindik týdy. Men sondaı-aq Eýrazıalyq ekonomıkalyq odaqtyń, Eýropalyq odaqtyń jáne Jibek joly ekonomıkalyq beldeýiniń kúsh-jigerin biriktirý búkil Eýrazıanyń ekonomıkalyq damýy úshin paıdaly bolatynyna da nazar aýdardym, – dedi Qazaqstan Prezıdenti.
