Qytaılyq kompanıalar Qazaqstandaǵy munaıdyń 25 paıyzyn óndiredi. Bul týraly búgin Astanadaǵy «KAZENERGY-2015» H Eýrazıalyq forým aıasyndaǵy baspasóz máslıhatynda «KAZENERGY» qaýymdastyǵynyń tóraǵasy Tımýr Qulybaev málim etti. Bul týraly Qamshy portaly BAQ.kz -ke silteme jasaı otyryp habarlaıdy.
«Qytaılyq kompanıalar Qazaqstan munaı sektorynda eń belsendilerdiń biri, ıaǵnı olar elimizde munaıdyń 25 paıyzdan astamyn óndirýde. Qazirgi kezde naryqqa qytaılyq SINOPEC GROUP atty jańa kompanıa keldi. Olar Qazaqstandaǵy Lýkoıldyń aktıvterin satyp aldy», - dedi T. Qulybaev.
Onyń sózine qaraǵanda, Qytaıǵa qaraı qubyrlardyń qýattylyǵy 12 mln. tonnany qurap otyr.
«Jalpy, Qytaıǵa qaraı bizdiń qubyrlardyń ótkizgishtik qabilettiligin 20 mln. tonnaǵa deıin keńeıtýge bolady degen túsinik bar. Bul el biz úshin aýqymdy naryq bolyp tabylady. Ekinshi jaǵynan alyp qaraǵanda, bul baǵyttaǵy naryq óte keń, óıtkeni, syrttan jetkiziletin energıa kózderine táýeldi. Sondyqtan da olar ózderiniń qaýipsizdigi men naryqtarynyń qajettiligi turǵysynda kómirsýtekterdi jetkizý boıynsha Qazaqstanmen yntymaqtastyqty belsendi damytýda», - dedi T. Qulybaev.
Osy oraıda ol Qazaqstan da kómirsýtekterdi atalǵan elge eksporttaýda qyzyǵýshylyq tanytyp otyrǵandyǵyn atap ótti. Sebebi, kórshiles Ózbekstan, Ázerbaıjan, Túrkmenstan, Reseı, Iran memleketteri de munaı nemese gaz óndiretin elder bolǵandyqtan, Qazaqstan osy elderge óz ónimin shyǵara almaıdy.
