Keshe, 29 qyrkúıekte Qyzylordada Eńbek kúnine oraı "Ata kásip-altyn mura" atty ekinshi eńbekshiler forýmy ótti. Bul týraly Qamshy portaly today.kz-ke silteme jasaı otyryp habarlaıdy.
Atalǵan forýmǵa eńbek sabaqtastyǵyn jalǵastyrýshy dárigerler áýletiniń ókilderi, bilim berý salasynyń maıtalmandary, 600-den astam eńbek ótili bar temirjolshylar áýletteri, aýyl sharýashylyǵy salasynda jemisti eńbek etip júrgen barlyǵy 12 eńbekshiler áýleti qatysyp, Qyzylorda oblysy ákiminiń alǵys hatymen marapattaldy.
Bıylǵy jyldyń ereksheligi - forýmǵa Syr eliniń maqtanyshtary - balyqshylar áýleti, ata babamyzdyń kásibin jalǵastyrýshy malshylar áýleti, rýhanı qundylyqty nasıhattaýshy kitaphanashylar áýleti qatysty. Olardyń ishinde temir jol salasy boıynsha 744 jyl eńbek ótili bar Baısaǵulovtar áýleti, 600 jylǵa jýyq temir jol salasynda aıanbaı eńbek etip kelgen jalaǵashtyq Badraqovtar áýleti de bar. Sondaı-aq, qarmaqshylyq Jumataevtar áýletinde 18 adam bilim salasynda jemisti eńbek etýde. Olardyń jalpy eńbek ótili 530 jyldy quraıdy.
Saltanatty sharada oblys ákimi Qyrymbek Kósherbaev qarapaıym eńbek adamyn qurmetteýdiń mańyzyna toqtalyp, jıylǵandardy Eńbek kúni merekesimen quttyqtady.
- Osyndaı óz kásibin atadan balaǵa mıras ete bilgen, bir salanyń damýyna otbasy bolyp úles qosyp júrgen azamattardy madaqtap, marapattap, kópshilikke úlgi qylýymyz qajet. Bul jastardyń bolashaqta mamandyq tańdaýyna da, óz isine qurmetpen qaraýyna da zor úles qosary sózsiz. Bolashaqta osy áýletterdiń qataryna jańa mamandyq ıegerleri, baǵdarlamashylar, sot salasynyń ókilderi, qurylysshylar, munaıshylar qosylady degen oıdamyn. Siz ben bizdiń eńbegimiz elimizdiń básekege qabiletti 30 eldiń qataryna enýin qamtamasyz etýge qosqan úles bolýy kerek, - dedi aımaq basshysy.
Eńbekshiler áýletiniń ókilderi de ózderine kórsetilgen qurmetke rızashylyqtaryn bildirdi.
- Bizdiń áýletimizde densaýlyq saqtaý salasynda 19 jan eńbek etýde, sondaı-aq 2 stýdent bolashaq dáriger atanbaq. Qazirgi kúni oblysta densaýlyq saqtaý salasyn damytý maqsatynda biraz jumystar atqarylýda. Bıyl 4 emhana paıdalanýǵa berilse, aldaǵy ýaqytta taǵy 2 emhananyń qurylysy aıaqtalmaq, - degen dáriger Shyntas Zetov aıanbaı eńbek etý úshin barlyq jaǵdaı jasalyp otyrǵandyǵyn jetkizdi.
Forým jergilikti ónerpazdardyń án-shashýymen qorytyndylandy.
