Májilis depýtattary bir aýyzdan dintanýshylar dinı baǵyttaǵy «Asyl arna» telearnasyn tekserýi tıis dep eseptep otyr. Bul týraly «Qamshy» portaly IA Total.kz saıtyna silteme jasaı otyryp habarlaıdy. Atalmysh saıt WikiLeaks.org saıtynda jaryq kórgen Saýd Arabıasynyń «Saudi Cables» dep atalatyn qupıa qujatynda  Qazaqstandaǵy «Asyl arna» telearnasyn qarjylandyrý týraly hat bar ekendigin jarıalaǵan. Vıkılıks saıtynda jaryq kórgen hatta  Qazaqstandaǵy «Asyl Arna» telearnasyn qarjylandyrý týraly jazylǵan. Qujatta Saýd Arabıasynyń Mádenıet jáne aqparat mınıstrliginiń resmı ókilderi atalmysh arnaǵa qarjy bólý týraly máseleni talqylaǵan.

Depýtat Aıqyn Końyrov BAQ –ta jaryq kórgen aqparat arnany tekserýge tolyq negizdeı alady dep esepteıdi. « Memlekettik organdar BAQ-ta qyzý talqylanyp jatqan bul jaǵdaıǵa mán berýi tıis. Olardyń ne týraly aıtyp, qandaı aqparat taratatyndyǵy týraly  saraptama júrgizý kerek. Meniń bilýimshe, bundaı arnany tirkeý men taratý ońaı sharýa emes. Arna tirkelý aldynda óziniń kontenti týraly baǵdarlama jasap ótkizdi dep esepteımin. Men ózim BAQ salasynda qyzmet atqarǵanmyn, sondyqtan barlyǵyn baqylap otyratyn mamandardyń bar ekenin bilemin. Bul ne adamı faktor, nemese jınaqtalǵan «syndarly toptyń» áseri. Men osy eki nusqany usyna alamyn»,- dep óz oıyn ortaǵa salǵan.  Al,  májilis depýtaty  Asqat Bekenov «Asyl arnany» ýaqyty bar kezde qaraıtynyn, biraq arnadan eshqandaı úgit-nasıhat úlgilerin baıqamaǵandyǵyn aıtty.  « Bul arnany shetel qarjylandyrady degendi estimeppin. Atalmysh máselege baılanysty quqyq qorǵaý organdary tekseris júrgizýi tıis. Sáláfızm men vahabbızm ıdeıasy bizdiń qoǵamda baıaǵyda-aq beleń alyp ketken. Tipti osy ıdeologıany ustanatyndar da artyp keledi. Biraq ol bizdiń ustanatyn dástúrli ıslamymyzǵa qaıshy keledi»,-dep esepteıdi Bekenov.  

Aqparattyń jedel túrde taraǵanyna baılanysty  áleýmettik jeli paıdalanýshylar da bul jaǵdaıdy qyzý talqyǵa salyp jatyr.

Aınur Tóleý