Bıyl Ramazan aıy 23 naýryzda bastalyp, 21 sáýirde aıaqtalady. Bul týraly Óńirlik kommsnıkasıalar alańynda Almaty qalasynyń bas ımamy Tólebı Qajy Ospan málimdedi.
«Barshańyzdy kúlli musylman qaýymy asyǵa kútken qasıetti Ramazan aıynyń kelýimen shyn júrekten quttyqtaımyn! 14 naýryz kúni elordada Bas múftı Naýryzbaı qajy Taǵanuly BAQ ókilderiniń qatysýymen baspasóz máslıhatyn ótkizdi. Bıyl Ramazan aıy 23 naýryzda bastalyp, 21 sáýirde aıaqtalatynyn esterińizge salǵymyz keledi. Sáýirdiń 17-nen 18-ne qaraǵan tún – Qadir túni. 21 sáýir – oraza aıt merekesi», - dep habarlady ol.
Bıyl pitir sadaqa mólsheri – 535 teńge bolyp bekitildi.
Sondaı-aq ımam almatylyq kásipkerlerdi elimizdiń Bas múftıiniń áleýmettik mańyzy bar taýarlar men azyq-túlik baǵasyn múmkindiginshe 10 paıyzǵa deıin tómendetý týraly úndeýin qoldaýǵa shaqyrdy.
«Osy sátti paıdalanyp, barsha qaýymǵa qasıetti Ramazan aıynda araq-sharap ishilmese jáne dúkenderde satylmasa, múmkindiginshe qudaıy astar keshki aýyzashar ýaqytynda ótkizilse degen tilegimizdi jetkizemin», - dep tolyqtyrdy ol.
Sonymen birge, Almatyda qasıetti Ramazan atap ótýdiń jospary bekitilgeni belgili boldy.
Bıyl qaladaǵy 54 meshittiń 50-inde taraýıh namazynda quran hatym túsiriledi. Qalǵan 4 meshitte, atap aıtsaq: Medeý aýdany «Ismıhan» meshiti, Naýryzbaı aýdany «Kúlıza ana» meshiti, Túrksib aýdany «Makka» meshiti, Túrksib aýdany «Ar-Rahım» meshitinde taraýıh namazy quran hatymsyz oqylady.
Almaty ortalyq meshitinde «Ramazan shatyry» qurylyp, kúndelikti 500 kisige aýyzashar dastarhany jaıylmaq. Sondaı-aq, qala meshitterinde de aýyzashar beriledi.
Bıylǵy jyldy QMDB «Islam jáne İzgi qoǵam» jyly dep jarıalaǵandyqtan oraza aıynda «Ramazan – izgilik aıy» aıasynda túrli sharalar: kezdesý, semınar, dóńgelek ústel, suhbat, ýaǵyz-nasıhat, qaıyrymdylyq t.b. uıymdastyrylmaq. Sondaı-aq, Almaty turǵyndary arasynda «Jarapazan-Party» baıqaýy ótedi.
