Senat Tóraǵasy Qasym-Jo­mart Toqaevtyń jetek­shili­gimen keshe palatanyń kezekti jalpy oty­rysy bolyp ótti. Ondaǵy ózi­niń kirispe sózinde Tóraǵa El­basy Nursultan Nazarbaev BUU Bas Assambleıasynyń tarı­hı mereıtoılyq sesıasynda álemdik daǵdarysty eńserý já­ne halyqaralyq qaýipsizdikti ny­ǵaıtýda orasan zor máni bar naqty bastamalar kótergendigine erekshe toqtaldy.

«Elbasy BUU Bas Assam­b­leıa­synyń tarıhı mereıtoılyq sesıa­synda sóılegen sózinde álemdik daǵdarysty eńserý jáne ha­lyq­aralyq qaýipsizdikti nyǵaıtýda orasan zor máni bar naqty bastamalar kóterdi. Pre­zıdent HHİ ǵasyrda ıadrosyz álem qalyptastyrý jáne «Jańa Bola­shaq» tujyrymdamasyn ázirleý týraly, sondaı-aq, halyqaralyq terro­rızmge qarsy kúrestiń dúnıe­júzilik jelisin qurý qa­jettigi týraly málimdedi», – dedi Q.Toqaev.

«Zamanymyzdyń asa táji­rı­beli saıasatkeri, Azıadaǵy qaýip­sizdiktiń irgetasyn qalaýshy, Eýrazıadaǵy yqpaldastyqtyń negizin salǵan Prezıdentimizdiń bastamalary halyqaralyq saıa­sı jáne dıplomatıalyq qoǵam­dastyqtyń asa joǵary qyzy­ǵýshylyǵyn týdyratyny daýsyz. Búginde bul bastamalarǵa álemniń jetekshi memleketteri nazar aýdarýda», – dep atap ótti Tóraǵa. Q.Toqaevtyń pikirinshe, Prezıdenttiń álemniń basty minberinen sóılegen sózi Qa­zaqstan úshin asa zor strategıalyq mańyzǵa ıe. Bul bastamalar qazirgi qubylmaly álemde elimizdiń ustanymdaryn nyǵaıta túsedi.

Senat otyrysynyń kún tárti­bine kiriserdiń aldynda Tóraǵa palata Prezıdenttiń «100 qadam» strategıalyq baǵdarlamasyn iske asyrýdy kózdeıtin zań jobalaryn qarastyrýǵa kirisetinin erekshe atap ótti. Strategıa elimizdiń ishki áleýetin kúsheıtýge baǵyttalǵan, dedi Q.Toqaev. Jumystyń nátıjeli bolatynyna senim bildirgen Senat Tóraǵasy Qazaqstannyń halyq­aralyq bedelin odan ári arttyryp, qoǵamda turaqtylyq pen keli­simniń nyǵaıýyna Senat depýtattary óz úlesterin qosatynyn aıtty.

Otyrys barysynda palata on úsh zań jobasyn qarady. Qazaq­stannyń Dúnıejúzilik saýda uıymyn kurý týraly Marrakesh kelisimine qosylýy týraly hattama ratıfıkasıalandy, sondaı-aq, elimizdiń osy uıymǵa kirýine baı­lanysty zańnamaǵa túzetýler qabyldandy.

Senatorlar, sonymen birge, Eýra­zıalyq ekonomıkalyq odaq sheń­berinde dárilik zattar aına­lysynyń biryńǵaı qaǵıdattary men qaǵıdalary týraly kelisimdi, EAEO sheńberinde medısınalyq buıymdar aınalysynyń biryńǵaı qaǵıdattary men qaǵıdalary týraly kelisimdi, Qylmystyq jazany shetelde óteý týraly amerıkaaralyq konvensıany, Qazaqstan men Reseı úkimetteri arasyndaǵy Qazaqstandyq Balqash torabyn berý sharttary jáne ony zymyran shabýyly týraly Reseı eskertý júıesinde odan ári paıdalaný tártibi týraly kelisimdi, Qazaqstan men Qyrǵyzstan úkimetteri arasyndaǵy Halyqaralyq avtomobıl qatynasy týraly kelisimge ózgerister engizý týraly hattamany, Qazaqstan men Iran úkimetteri arasyndaǵy Jolaýshylar men júkterdiń halyqaralyq avtomobıl tasymaldary týraly kelisimdi de ratıfıkasıalady.

Jan-jaqty talqylaı kelip, depýtattar Qazaqstan halqy Assambleıasy týraly zańǵa túzetý­lerdi qabyldady. Bul qujat Mem­leket basshysynyń «Nur Otan» partıasynyń HVI sezin­de jáne Qazaqstan halqy Assam­bleıasynyń HHİİ sesıasynda berilgen tapsyrmalary negizinde ázirlendi. Qujattyń maqsaty «Máńgilik El» jalpyulttyq otan­shyldyq ıdeıasyn iske asyrýǵa baǵyttalǵan tutastaı memle­kettik saıasat qalyptastyrý úshin qoldanystaǵy zańnamaǵa ózgeris­ter men tolyqtyrýlar engizý bolyp tabylady. Osyǵan baılanys­ty kirispege, «Bolashaǵy birtutas ult» ınstıtýttyq reformasynda bekitilgen qundylyqtar negizinde elimizdegi ultaralyq kelisimdi qamtamasyz etýdi kózdeıtin ózgerister engiziledi. Odan basqa, zań jobasy Qazaqstan halqy Assambleıasynyń Assambleıa Tóraǵasy retinde Memleket basshysyna jyl saıynǵy esepterin qarastyratyn erejelermen tolyqtyrylǵan. Engiziletin ózgerister men tolyqtyrýlar Assambleıanyń ınstıtýttyq rólin kúsheıtedi, qoǵamdyq kelisimdi, «Máńgilik El» ıdásynyń jalpy qundylyqtary negizinde qazaqstandyq birtektilik pen birliktiń nyǵaıýy úshin jaǵdaı jasaıdy.

Palata zańnamaǵa jol-kólik ınfraqurylymyn, kóliktik logıstıkany jáne avıatasymaldy damytý máseleleri boıynsha túzetýlerdi eki oqylymda qarady jáne qabyldady. Qujat Memleket basshysy N. Nazarbaevtyń bes ınstıtýttyq reformany iske asyrý jónindegi 100 naqty qadam – Ult josparyn iske asyrý maqsatynda ázirlendi. Onda elimizdiń Azamattyq kodeksine halyqaralyq standarttarǵa sáıkes aralas tasymaldar ınstıtýtyn damytýdy quqyqtyq reglamentteý bóliginde túzetýler engizý kózdelgen. Búdjet kodeksine eger shartta qunyn ulǵaıtýdy qarjylandyrý boıynsha ózge talaptar belgilense, jobalyq-smetalyq qujattamany túzetpeı, aza­mattyq-quqyqtyq shartqa sáıkes búdjettik ınvestısıalyq joba­lardyń smetalyq qunyn ulǵaıtý kezinde qarjylandyrý múmkindigin kózdeıtin túzetýler engizilgen.

«Salyq jáne búdjetke tó­lenetin basqa da mindetti tólemder týraly» kodekste biryńǵaı taýar-kólik júk qujatyn tranzıttik júkterdi aralas tasymaldaý kezinde biryńǵaı halyqaralyq tasymaldaý qujaty retinde taný kózdelgen. Budan basqa, zań jobasynda Avtomobıl joldaryn basqarý jónindegi ulttyq operatordyń ózin ózi qarjylandyrýǵa birtindep kóshýi, Qazaqstan Respýblıkasy kórsetetin halyqaralyq kólik qyzmetteriniń ashyqtyǵyn, ıkemdiligi men jyldamdyǵyn qamtamasyz etý, áýe kóligin paıdalaný salasynda memlekettik retteý, baqylaý jáne qadaǵalaý tetigin jasaý úshin qoldanystaǵy zańnamanyń normalary jáne basqa da erejeleri jetildiriledi.

«Qazaqstan Respýblıkasynyń keıbir zańnamalyq aktilerine arnaıy ekonomıkalyq aımaqtardy jetildirý máseleleri boıynsha ózgerister men tolyqtyrýlar engizý týraly» zań eki oqylymda qaralyp, qabyldandy. Qujat olardyń qyzmetin ońtaılandyrý boıynsha normalardy, arnaıy ekonomıkalyq aımaqtar basqarýshy kompanıalarynyń ınvestısıalyq tartymdylyǵy úshin jaǵdaı jasaý­dy jáne olardyń ókilettikterin keńe­ı­týdi kózdeıdi. Osylaısha, zań jo­basy sheńberinde arnaıy ekono­mıkalyq aımaqtardy qurý, olar­dyń jumys isteýi men olardy basqarý salasynda biryńǵaı mem­lekettik saıa­satty ázirleý jáne baqy­laýdyń negizgi fýnksıalaryn júze­ge asyrý atqarýshy bıliktiń ýáki­let­ti memlekettik organyna júkte­ledi.

Senatorlar eki oqylymda talqy­la­ǵannan keıin «Qazaqstan Respýb­lı­kasynyń keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly», «Qazaqstan Respýblıkasynyń keı­bir zańnamalyq aktilerine sáýlet, qala qurylysy jáne qurylys qyz­meti máseleleri boıynsha ózgerister men tolyqtyrýlar engizý týraly» zań jobalaryn da qabyldady. Basqa zańnamalyq qujattar boıynsha da tıisti sheshimder alyndy.

Derekkóz: Egemen Qazaqstan