Keıingi kezderi saıası arenadaǵy qarama-qaıshylyqtardyń zalaly men zardaby anyq baıqalyp jatqany sózsiz. Ol ózin aqtaıdy ma? Biz úshin beımálim dúnıe bul. Biraq qansha degenmen dál osy sátte dosyń men dos, baýyryńmen baýyr bolyp qalýdyń jolyn izdegen abzal sıaqty. Endigi kezektegi másele mynada: Baýyrlas el bolyp sanalatyn Túrkıa elimen Reseıge qarsy sanksıaǵa qatysty  kózqarasta qarama qaıshylyq paıda bolyp otyr. Oıymyzdy naqtylaý úshin taqyrypty keńinen tarqatyp kórsek.

            Túrkıa memleketiniń basshysy Taıyp Erdoǵan Reseıdiń ushaqtarynyń óreksel qatelikke boı bergenin aıtyp, ony qatań jazalaýǵa shaqyrdy.

            Reseı ushaqtarynyń Túrkıa terıtorıasyna engeni týraly daýǵa núkte qoıylǵan negizi nemese qoıylǵandaı boldy. Bul týraly Túrkıanyń premer-mınıstri Ahmet Dáýitoǵly málimdegen bolatyn. Máskeý resmı keshirim surap, ekeý-ara keshirim jasasyp tarqasqan-dy. Alaıda, premeriniń bul sheshimimen Erdoǵan kelise almaǵanǵa uqsaıdy.

            Túrkıa prezıdenti aldaǵy ýaqytta Reseıden gaz eksporttaý máselesin qaıta qarastyratynyn málimdedi. Aıta ketýimiz kerek, Túrkıa búginde «GazPromnyń» eń úlken seriktesi. Demek ekeý-ara arazdyq Reseı ekonomıkasyna  úlken zalal keltiretini sózsiz.

            Esterińizge sala keteıik, Reseı ushaqtary baýyrlas Túrkıa memleketiniń áýe keńistigine birneshe sekýntqa enip ketken. Keıin Kreml bul oqıǵany kún  raıynyń qolaısyzdyǵynan ketken qatelik dep keshirim suraǵan bolatyn.

            Erdoǵan óz eliniń áýe keńistigin buzý, NATO-nyń áýe keńistigin buzý bolyp tabylady jáne bul fakti boıynsha Reseıdiń bergen málimdemesi dereksiz ári salmaqsyz dep málimdedi. Sóıtti de minbeden turyp Máskeýdiń bul bassyzdyǵy úshin sazaıyn tarttyryp, qatań jazalaý kerek dep jar saldy.

            Iá, dál búgingi jaǵdaıda bundaı málimdemelerge toıynyp boldyq. Alaıda osy tusta bizdi oılandyratyn bir másele. «Qamshy» jańalyqtaryn qaıta sholyp oqysańyz el Prezıdenti Nursultan Ábishulynyń Reseıge sanksıa salýdy doǵarý kerek degen málimdemesin oqısyz.

            El prezıdenti fransýzdyń Le Figaro gazetine bergen suhbatynda Batysty ekonomıka men saıasatty shatastyrmaý kerektigin málimdegen bolatyn 

            "Eýropa Reseıge qatysty sanksıa rejımin alyp tastaý qajet. Bul sanksıalar saıasat turǵynysynan nátıje bermedi. Reseıdiń ótkenine qarańyzdar - bul qýatty el. Sanksıa arqyly bul eldi saıası baǵytynan aınyta almaısyzdar", - dep málimdedi Elbasy.

            Endigi kezek ısi qazaqtyń mańdaıyna sap ete qalatyn bir suraq týyndaıdy. Bizge Reseı jaqyn ba, álde Túrkıa ma? Aıtqyzbaı-aq belgili. Biz reseıdiń eń jaqyn seriktesimiz. Baǵytymyz bir. Ekonomıkamyz tyǵyz baılanysta. Alaıda, Túrkıa she? Etnıkalyq baýyrymyz, táý etken táýelsizdigimizdi eń alǵash moıyndaǵan memleket qoı. Biraq atalǵan máselege kelgende kózqarastaǵy qaıshylyq anyq baıqalady hám alańdatatyny taǵy bar.

            Baýyrlas eldiń baǵyty bólek búginde. Al baýyrlas eldermen pikirdiń qaıshy bolýy bizdiń múddemiz be? Álde... Ary tartsań arba synady, beri tartsań ógiz ólediniń kesiri.

Arqalyq Saǵı

"Qamshy" silteıdy