Óńdeý jumystary tańǵy ýaqytta júrgiziledi. Almatyda 15 mamyrdan bastap aýdany 2424,54 ga bolatyn ormandy alqaptarda, qala saıabaqtary men skverlerinde kenelerge qarsy dezınseksıalyq óńdeý jumystarynyń ekinshi kezeńi bastalady. Bul týraly Almaty qalasynyń sanıtarıalyq-epıdemıologıalyq baqylaý departamentiniń basshysy Qasymhan Alpysbaıuly aıtty.

Spıkerdiń sózinshe, Almatyda 15 mamyr - 5 maýsym aralyǵynda kenege qarsy dezınseksıalyq óńdeý jumystarynyń ekinshi kezeńi ótedi.

«Óńdeý jumystarymen 8 ormandy alqap (kólemi – 1904,924 ga), 144 qala saıabaqtary men skverleri (kólemi – 519,616 ga) qamtylady jáne aýa-raıyna baılanysty, ıaǵnı, qurǵaq, jaýyn-shashynsyz kúnderi kestege sáıkes 15 mamyrdan 5 maýsymǵa deıin júrgiziledi. Dezınseksıalyq is-sharany qalalyq sanıtarıalyq-epıdemıologıalyq baqylaý qyzmetiniń mamandarynyń baqylaýymen «Almaty qalasynyń dezınfeksıa ortalyǵy» fılıaly júrgizedi», - dedi Qasymhan Alpysbaıuly.

Jasaqtalǵan dezbrıgadalar qajetti quraldarmen, kóliktermen jáne jeke bas qorǵanysh zattarymen jabdyqtalǵan. Óńdeý jumystaryn júrgizý úshin «Favorıt» akarısıdtik preparaty qoldanylady. Preparat az ýytty jáne qaýiptiligi tómen sanatqa jatqyzylady (3-4 klass).

Kenelermen kúresý úshin qoldanylatyn dozalar eń az jáne adamdar men janýarlar úshin qaýipsiz bolyp tabylady.

«Óńdeý jumystary tańǵy saǵattarda júrgiziledi. Óńdeletin aýmaqtardyń shekaralarynda «Kenege qarsy óńdeý júrgizilýde» eskertý habarlamalary bar taqtalar ornatalady», - dedi Almaty qalasynyń SEBD basshysy.

Eske salaıyq, Almatyda 29 naýryz – 28 sáýir aralyǵynda kenelerge qarsy óndeý jumystarynyń birinshi kezeńi ótken bolatyn.