Prokýratýra Mańǵystaý oblysynyń kolejderinde jalǵan dıplomdarmen jumys istegen qyzmetkerlerdi anyqtady, dep habarlady Mańǵystaý oblysynyń prokýratýrasy.

Oblystyq prokýratýra málimetinshe, taldaý jalǵan qujatty paıdalanýdyń 8 deregin anyqtady: Aqtaý kolejderinde – 5 oqytýshy, Qaraqıa aýdanynda – 3 oqytýshy jumys istegen.

Prokýrorlar barlyq faktiler boıynsha sotqa deıingi tergep-tekserýdi bastap materıaldardy odan ári tergep-tekserý júrgizý úshin polısıa organdaryna joldaǵan.

Mysaly, quqyq buzýshylardyń biri 2 jyl boıy Qaraqıa kásiptik kolejinde jalǵan dıplommen tamaqtandyrýdy uıymdastyrý boıynsha oqytýshynyń jumysyn atqarǵan.

Qaraqıa aýdanynyń soty ony QR Qylmystyq kodeksiniń 385-babynyń 3-bóligi (kórineý jalǵan qujatty paıdalaný) boıynsha 30 saǵat qoǵamdyq jumystar túrinde jaza taǵaıyndaýmen qylmystyq jaýaptylyqqa tartty.

Osy tektes quqyq buzýshylyq úshin atalǵan sot sol kolejdiń basqa eki oqytýshysyna qatysty úkim shyǵardy, olar jumystan bosatyldy.

Tórt epızod boıynsha polısıa organdarynyń sotqa deıingi tergep-tekserý júrgizgen qylmystyq isteri raqymshylyq aktisi boıynsha toqtatyldy.

Bir derek boıynsha sotqa deıingi tergep-tekserý áreketteri júrgizilýde.

Aıta keteıik, 2022 jyly prokýratýra uqsas faktiler boıynsha 14 qylmystyq is tirkegen jáne osy baǵyttaǵy jumystardy jalǵastyrýda.

Mańǵystaý oblysynyń prokýratýrasy azamattardy bolashaq urpaqqa qajetti bilim berý jáne kásibı ortany qoldaý úshin shynaıy bilim alýǵa shaqyrady.