Búgin Májilis spıkeri Erlan Qoshanovtyń tóraǵalyǵymen Parlament Palatalarynyń birlesken otyrysy ótip, onda birinshi sesıanyń jumysy qorytyndylandy.

Erlan Qoshanov Parlamenttiń osy sesıasy nebári 100 kúnge sozylǵanyna qaramastan, atqarǵan jumysy óte mańyzdy ári mazmundy bolǵanyn atap ótti.

– Ótken jyly Qazaqstan halqy búkilhalyqtyq referendýmda Prezıdent reformalaryn qoldady. Elimizdiń jańarǵan Konstıtýsıasy búkil memlekettik júıe boıynsha aýqymdy ózgeristerge jol ashty. Sýperprezıdenttik júıeden prezıdenttik respýblıka úlgisine kóshtik. Parlamenttiń róli men mártebesi kúsheıdi. El basqarý isine halyqtyń atsalysý belsendiligi arta tústi, – dedi E.Qoshanov.

Sesıa barysynda Palatalardyń 3 birlesken otyrysy, Senattyń 12 jáne Májilistiń 15 jalpy otyrysy ótti. Onda 120-dan astam másele qaraldy. Sondaı-aq Parlamenttiń qaraýynda 82 zań jobasy bolsa, sonyń ishinde 25 zań qabyldanyp, 13 zańǵa Prezıdent qol qoıdy.

– Qazirgi saılanymnyń basty ereksheligi – kóptegen mańyzdy zań jobasynyń depýtattardyń bastamasymen ázirlenýi. Olarǵa saılaýshylardyń talap-tilegi, muń-muqtajy, El Prezıdentiniń tapsyrmalary arqaý boldy, – dedi E.Qoshanov.

Depýtattar bastamashy bolǵan zań jobalarynyń ishinde – zańsyz alynǵan aktıvterdi qaıtarý, suıytylǵan gaz aınalymyn retteý jáne turǵyn úı-kommýnaldyq sharýashylyǵy, onlaın-platformalar jáne onlaın-jarnama máseleleri, Kásiptik biliktilik týraly zańdar bar.

Máselen, Erlan Qoshanovtyń aıtýynsha, elektr samokattardyń kóp qoldanylýy adamdardyń qaýipsizdigine áser etip otyr. Sondyqtan olardyń júrisin retteý jónindegi túzetýler Parlamentte qyzý talqylandy. Osy oraıda Májilis tóraǵasy depýtattar qabyldaǵan zań jaıaý júrginshilerdiń de, samokat júrgizýshileriniń de qaýipsizdigin qamtamasyz etetinin aıtty.

Sonymen qatar Palata tóraǵasy burynǵy Semeı ıadrolyq polıgony aýmaǵyn zertteý men qaýipsizdigin qamtamasyz etý máselesi kópten sheshimin tappaı kele jatqan túıtkildi jaıttyń biri ekenine nazar aýdardy. Búginde bul másele zańnamalyq deńgeıde sheshimin tapty.

Sondaı-aq osy sesıada Májiliste alǵash ret Joǵary aýdıtorlyq palatanyń esebi tyńdaldy.

– Memleket basshysynyń «Kúshti Prezıdent – yqpaldy Parlament – esep beretin Úkimet» formýlasy aıasynda Májilistiń ókilettigi, baqylaýshylyq fýnksıasy kúsheıtildi. Prezıdent aıtqandaı, biz búdjettiń atqarylý barysyn, árbir tıynnyń jumsalýyn qatań qadaǵalaýymyz qajet. Osyǵan oraı Joǵary aýdıtorlyq palatanyń esebin tyńdadyq. Onda halyqty tolǵandyratyn eń ózekti taqyryp – jylýmen qamtý máselesi kóterildi, – dedi E.Qoshanov.

Ótken sesıada barlyǵy 11 halyqaralyq shart pen memleketaralyq kelisim ratıfıkasıalandy. Qos palata depýtattary Úkimet pen basqa da memlekettik organdarǵa 306 depýtattyq saýal joldady.

Erlan Qoshanov osy sesıanyń ózinde halyq qalaýlylarynyń atyna túsken 7 myńǵa jýyq hat qaralǵanyn jáne az ýaqyt ishinde Májilis janyndaǵy Qoǵamdyq qabyldaýǵa 800-den astam adam kelgenin atap ótti.

Birinshi sesıany qorytyndylaı kele, Májilis spıkeri qos palatanyń shet eldermen jáne halyqaralyq uıymdarmen yntymaqtastyqty nyǵaıtý baǵytynda da aýqymdy jumys atqarǵanyn aıtty.

Budan bólek, Májilis tóraǵasy Úkimetpen birlesken jumys kezindegi keıbir máselelerge nazar aýdardy.

– Úkimettiń zańǵa bastamashy bolý jumysy tıisti deńgeıde atqarylmaı otyr. Qoǵamda shuǵyl sheshimin kútip otyrǵan túıtkildi másele kóp ekenin bilesizder. Olar, birinshi kezekte, zańnamalyq turǵydan sheshýdi qajet etedi. Ókinishke qaraı, bul jaıttarǵa Úkimet der kezinde kóńil aýdaryp, qajetti zań jobalaryn Májiliske ýaqytyly usynbaı otyr. Sondyqtan depýtattar osy ótkir máselelerdi sheshýdi jedel túrde óz qolyna alyp, tıisti zań jobalaryna bastamashy bolýǵa májbúr. Osy oraıda Úkimetke belsendilikti arttyryp, kelesi sesıaǵa naqty ári qoǵamǵa qajet zań jobalaryn ázirleýdi jáne Parlamentke engizýdi tezdetýge tıis, – dedi.

Sonymen birge Palata tóraǵasy depýtattardyń túzetýlerine Úkimet qorytyndysyn qaraý merzimi uzaqqa sozylatynyna, belgilengen tártiptiń kóp jaǵdaıda saqtalmaıtynyna mán berdi. Osy oraıda Úkimetti qorytyndylardy kelisý rásimin qaıta qaraýǵa shaqyrdy.

Sondaı-aq Parlamentke keletin memlekettik organdar basshylarynyń daıyndyǵy men depýtattyq saýaldarǵa beriletin jaýaptar sapasynyń tómen ekeni de aıtyldy.

Májilis tóraǵasy kelesi aptadan bastap depýtattardyń óńirlerge sapary bastalatynyn aıtty.

–        Sol kezde qaralatyn zańdar boıynsha halyqpen  tereńirek pikir almasý, jurtshylyqtyń oıyn bilý mańyzdy. Parlament zańdardy halyq úshin jáne halyqpen birge jazady. Bul – bizdiń basty ustanymymyz, – dedi E.Qoshanov.

Májilis spıkeri kelesi sesıada da zań shyǵarý jumysy qarqyndy jalǵasatynyna senim bildirdi.

– Biz Ulttyq qordan balalarǵa bólinetin tólemder máselesi jónindegi zań jobasymen jumysty jalǵastyratyn bolamyz. Bul Prezıdenttiń aýqymdy reformalary aıasyndaǵy negizgi bastamasynyń biri. Memleket basshysynyń tapsyrmasy boıynsha Salyq, Búdjet, Sý, Qala qurylysy kodeksterimen, Memlekettik satyp alý, Ǵylym jáne tehnologıalyq saıasat týraly zań jobalarymen  jumys isteý mindeti aldymyzda tur, – dedi Májilis tóraǵasy.

Otyrys sońynda Erlan Qoshanov Úkimet múshelerine eki Palata apparattarynyń qyzmetkerlerine, sarapshylar qoǵamdastyǵyna,  buqaralyq aqparat quraldarynyń ókilderine birlesken jumysy úshin zor rızashylyǵyn  bildirdi.

Aıta ketý kerek, jıynǵa Qazaqstan Respýblıkasynyń Premer-Mınıstri, Memlekettik keńesshi, Prezıdent Ákimshiliginiń Basshysy, Konstıtýsıalyq Sottyń, Joǵarǵy Sottyń, Ortalyq saılaý komısıasynyń jáne Joǵary aýdıtorlyq palatanyń tóraǵalary, Úkimet músheleri, Prezıdentke tikeleı baǵynatyn jáne esep beretin memlekettik organdardyń basshylary men Parlament palatalary apparattarynyń jaýapty qyzmetkerleri qatysty.   

Májilistiń Baspasóz qyzmeti – 74-63-01. Sýretti túsirgen J.Jumabekov