Zamanynda júz túrlenip, myń qubylyp turatyn qoǵamnyń derti jetip artylady. Oǵan san qıly derekter keltirýge bolady. Biraq, sonyń ishindegi eń qaýiptisi – Qudaıdyń kóbeıýi. Ol – Qudaısyzdyqtan da qaýipti. Nanym men senimniń shekarasyndaǵy aıqas. Áńgimeniń álqıssasyna qaraı oıyssaq.

            El arasynda keıingi kezderi Pavel Globa degen azamattyń esimi keńinen taralyp júr. Reseıden kelgen astrolog-kóripkel san-túrli dúnıege óz kóz-qarasyn bildirip, bal ashyp júr. Iá, onyń aıtqandarynyń birazy dálme-dál túsýi de tań qaldyrmaı qoımasy anyq. Biraq óz elinde abyroıy men dańqy artyp turǵan astrolog Qazaqstanǵa nege keldi? Bul bizdi de tolǵandyrmaı ketpedi.

            Globa globaldy máselege bal ashyp, baǵyn ashýǵa qumar astrolog. Taıaýda ǵana Reseıdiń «Leter-nedelá» aqparattyq búrosyna bergen suqpatynda «Qazaqstan uly ımperıaǵa aınalady» degen sózdi aıtqan bolatyn. Globany «godat» etkenderiniń 85 paıyzy oryndalady-mys. Álbette óziniń paıymynsha. Biraq bul pikirdi ótken ǵasyrdyń eń uly kóripkeli Vanganyń ózi de aıtty emes pe?

            Másele bunda da emes. Eliń uly bolady dep, etene jaqyndasyp Globa ne utpaq sonda? Aqsha? Onyń otbasy qazir Germanıada turady. Demek Reseıde de jaǵdaıy jaman emes qoı. Onyń ústine astrolog-keıipker degenderińiz musylmansha mentalıtetti elge ótpeıtin dúnıe. Sáıkesinshe tabystyń kózi de munda azdaý bolatyny sózsiz. Demek aqsha máselesi emes. Al, maqul eń uly ımperıada ómir súrgisi keledi delik. Biraq nege Globa otbasymen Qazaqstanǵa kóship kelmeıdi? Bul nusqa da kelmeıdi. Úshinshi ne bar? Aram oı? Ult arasyndaǵy nanym-senimdi alastatý. Bir-birine aıdap salý. Neptýn, Plýtondar senderge bólinsin dep jatyr dese ne istemekpiz?

            Iá, qazir bul dúnıeler kúlkili bolýy múmkin. Biraq ýaqyt óte kele Globanyń «genıalnyı» boljamdary onyń artynan ergenderdiń qarasyn qaptatpasyna kim kepil? Menmin dep siz aıta alasyz ba? Joq.

            Globa kókemizdiń kóripkeldigi týraly aqparttar izdep otyryp Qazaqstan Musylmandar keńesiniń degenine kózim tústi. Kózim tústi de qaıran qaldym. Oıymyzǵa dóp túsken eken. «Qamshy» portaly uıymnyń baspasóz qyzmetine súıene otyryp málimdeıdi.

            QMK Globany dereý Qazaqstan terıtorıasynan deportasıalaýdy talap etip otyr. Olaı etpegen jaǵdaıda jaǵdaıdyń qıyn bolatynyn da jasyrmaıdy keńes. Sebebi jaǵdaı dál osy baǵytta jalǵasa beretin bolsa Qazaqstannyń ishki jáne syrtqy saıasaty sharlatandar men kóripkelderdiń degenderi arqyly júzege asatyn jaǵdaıǵa jetýi múmkin.

            Sondyqtan Qazaqstan Muslmandarynyń keńesi Pavel Globany dereý deportasıalaýdy talap etýde. Qudaıǵa degen senimmen san ǵasyrdan súrinbeı ótken elge Neptýn men Iýpıterdiń qoldaýynsyz qaryshtaýǵa ábden bolady. Globa elden ketse golaktıka qarǵamasy anyq. Eldigimizge seneıik. Qamshy tóbede emes, qolda oınasyn ardaqty aǵaıyn!

Aıan MEIRASH