Astanada adamdardy qutqarý kezinde erlikpen qaza tapqan batyr órt sóndirýshi Asqar Zabıkýlın týraly teleserıal qyrkúıekte kórsetiledi, dep habarlaıdy aqparat jáne qoǵamdyq damý mınıstrligi.
"Órt kezinde opat bolǵan batyr beınesin nasıhattaıtyn serıaldyń sújeti shynaıy oqıǵalarǵa negizdelgen – halyq qaharmany Asqar Zabıkýlın týraly. Bas keıipkeri – byltyr ǵana alaýmen arpalysyp, úsh adamnyń ómirin qutqarǵan, ókinishke qaraı, ózi ajal qushqan órt sóndirýshi Asqar Zabıkýllın”, - deıdi aqparat jáne qoǵamdyq damý mınıstri Darhan Qydyráli.
Mınıstr Astanada túsirilim alańyna baryp, shyǵarmashylyq toppen kezdesti.
Sonymen qatar, Asqar Zabıkýlınniń áıeli – Anel jáne qyzdarymen áserli áńgime boldy.
"Bas production" prodúserlik kompanıasy túsiretin serıal qyrkúıek aıynda "Astana" telearnasynda kórsetiledi.
Eske sala ketsek, byltyr 16 qarashada Asqar Zabıkýlın Astanadaǵy "Qaharmen" turǵyn úı kesheninde birneshe adamdy órtten aman alyp shyqty. Ol 12-qabatta ornalasqan terezeden qutqarý arqany arqyly 11 qabatqa túsip, janyp jatqan páterdiń terezesinen túsken.
Sol ýaqytta páterde adamdar bolǵan. Barlyǵy aman qutqaryldy. Onyń biri – 10 jastaǵy bala. Adam ómirine arasha bolǵan qutqarýshynyń denesiniń 80%-in kúıik shaldy. Ol 1-shi kóp beıindi qalalyq aýrýhanaǵa jetkizildi. Asqar Zabıkýlın tórt kúnnen keıin 20 qarashada aýrýhana tóseginde kóz jumdy.
Bıyl sáýir aıynda Astanada qutqarýshylar saıabaǵynda Asqar Zabıkýlınge eskertkish taqta ornatyldy.
