"Tomırıs" kitabynyń avtory Erjan Orymbetov Almaty qalalyq sotyna shaǵym túsirdi, ol Nursultan Nazarbaev pen onyń kishi qyzy Álıa Nazarbaevadan avtorlyq quqyqty buzǵany úshin 50 mln teńge óndirip alýǵa nıetti, dep Qamshy.kz habarlaıdy Ulysmedia.kz saıtyna silteme jasap.
Óz aryzynda Orymbetov 2013 jyly "Tomırıs" kitabyn jazǵanyn jáne ony fılm túsirý úshin Nazarbaev pen mádenıet mınıstrligine usynǵanyn atap ótti.
"Nazarbaev óziniń kómekshisi arqyly kitap úshin alǵysyn bildirdi, biraq fılm túsiriliminde qoldamady. 2017 jyldyń 10 sáýirinde kenetten Álıa Nazarbaevanyń ózi "Tomırıs" fılmin túsirip, prodúser jáne senarı avtory bolatyny belgili boldy. Nazarbaeva men "Qazaqfılm" AQ arasynda senarı ázirleýge arnalǵan shart qosymshada bar. Kartınaǵa tapsyrys berýshi QR Mádenıet mınıstrligi bolady. 2017 jylǵy 27 sáýirde prezıdent Nursultan Nazarbaev rejıser Aqan Sataevpen kezdesip, "Tomırıs” fılminiń senarıi boıynsha óz usynystaryn berdi. Sonymen qatar fılmdi túsirýshilerdiń eshqaısysy meni shaqyrǵan da, sóılesken de joq. Nátıjesinde "Tomırıs" fılmi meniń qatysýymsyz túsirildi jáne onyń tusaýkeseri 2019 jyldyń qyrkúıeginde ótti. Bul fılmdi kórgende men birden plagıat ekenin túsindim. Fılmniń sújeti, ondaǵan kórinisteri men dıalogtary meniń kelisimimsiz sózbe-sóz meniń kitabymnan kóshirildi. Osydan keıin birden fılmdi túsirýshi men tapsyrys berýshige avtorlyq quqyǵym buzylǵany týraly hattar jazdym. QR Mádenıet mınıstrligi men "Qazaqfılm" AQ-nyń birlesken jaýabynda kitap pen fılmdegi sáıkes keletin tustar az jáne kezdeısoq ekeni aıtylǵan", - deıdi avtor.
Ol Mádenıet mınıstrliginiń jaýaby shyndyqqa janaspaıtynyn aıtty.
"Mysaly, meniń kitabymdaǵy erekshe sóz tirkesi "Hvatıt slov!” fılmde úsh ret aıtylady. Al meniń shyǵarmamdaǵy Kırdiń saq taıpalaryna arnalǵan "Ia sotrý ıh s lısa zemlı" degen jeke sóılem fılmde eki ret qoldanylǵan. Meniń jumysymnan kóshirilgen mundaı tirkester kóp. Olardyń barlyǵy qosymshada usynylǵan. Spargapıstiń uly 3 jasynda at ústinde otyrǵanda jáne 4 jasynda sadaq tartqanda, meniń kitabymnan erekshe úzindi fılmdegi úsh kóriniste bar. Meniń eńbegimnen osyndaı ondaǵan kórinister alynǵan", - dep atap ótti avtor.
Ol sottan jaýapkerlerden talapkerdiń paıdasyna moraldyq jáne materıaldyq zalaldy óndirip alýdy suraıdy.
Talap etilgen soma – 50 mıllıon teńge.
Orymbetov óz sóziniń shyndyq ekenin dáleldeý úshin Nursultan Nazarbaevqa joldaǵan hatty jáne onyń kómekshisimen fılm túsirý týraly telefon arqyly júrgizilgen kelissózdi usyna alatynyn jetkizdi.
"Tomırıs" – rejıser Aqan Sataevtyń saq patshaıymy men Uly Kır týraly baıandaıtyn qazaqstandyq kórkem fılmi. Fılmniń premerasy 2019 jyldyń qyrkúıeginde ótti.
Prodúseri – Álıa Nazarbaeva.
Pikir qaldyrý