Bıylǵy qajylyq maýsymynyń basty ereksheligi 15 jeltoqsanǵa deıin tirkelgen azamattar ǵana qasıetti mekenge bara alady. Sebebi Saýd Arabıa Koroldigi Qajylyq jáne umra mınıstrliginiń talaby boıynsha «Qajylyq-2024» maýsymyna bıyl 15 jeltoqsanǵa deıin qajylary tirkelip bitken elderge qajylyq oryndary bólinbek.

Iaǵnı, 15 jeltoqsanǵa deıin qajylyqtyń elektrondy júıesine tirkelip, sol júıeden alynatyn qyzmet túrlerine (qonaq úı, Mına, Arafat jáne t.b. qyzmetteri) qarajaty tólengen kisi sanynyń kólemine saı, Qazaqstan azamattary úshin qajylyq oryndarynyń sany aıqyn bolmaq.

Osyǵan oraı, Qazaqstan musylmandary dinı basqarmasy 2024 jylǵy qajylyq maýsymynda azamattarǵa qajylyq saparyn uıymdastyrýǵa qabiletti týroperatorlar arasynda ashyq konkýrs jarıalaǵan bolatyn. Konkýrs boıynsha 7-17 qyrkúıek aralyǵynda týroperatorlardan qujattar qabyldady.

Qajylyqpen aınalysatyn týroperatorlardy anyqtaý úshin arnaıy komısıa músheleri bekitildi. Týroperatorlardy tańdaýda ashyqtyqty qamtamasyz etý maqsatynda «Úmitker týroperatorlarǵa qajylyq oryndaryn bólý» týraly QMDB erejesi basty nazarǵa alyndy.

Konkýrsqa 31 týrkompanıa qujat ótkizdi. Onyń ishinde konkýrsqa qatysýdyń basty talaptaryna sáıkes keletin  17 týroperator konkýrsqa jiberildi. Qalǵan 14 týrfırmanyń konkýrs sharttaryna sáıkes kelmeýi sebebinen konkýrsqa jiberilmedi.

Týroperatorlardan kelgen ótinishter men talap etilgen qujattar ortaǵa salynyp, árqaısysy muqıat qaraldy. Komısıa músheleri joǵarydaǵy erejege súıene otyryp, týroperatorlarǵa qosymshada kórsetilgendeı baldyq júıemen baǵa berdi.

Konkýrstan ótip, Saýd Arabıa Koroldigi Qajylyq jáne umra mınıstrligine qarasty qajylyqtyń elektrondy júıesine resmı tirkeletin 17 týroperator osy jyldyń 15 jeltoqsanyna   deıin jınaǵan qajylary men qarjylyq múmkinshiligine qaraı qajylyq oryndaryn alatyn bolady.

Al konkýrsqa jiberilmegen týrkompanıalar resmı 17 týroperatordyń birimen agenttik kelisim-shart qurýy negizinde 100 (júz) qajylyq ornyna deıin alýyna bolady delingen.