– İs prokýratýrada. Prokýratýra isti sotqa jiberý-jibermeý máselesin 5-10 kúnniń ishinde sheshedi, – dedi Meıirjan Dosqaraev Azattyq tilshisine.
Keıingi kezde bılikti qatań synap, beıbit aksıalarǵa qatysyp kelgen 60 jastaǵy belsendi Marat Jylanbaev "tyıym salynǵan uıymnyń isine aralasý" jáne "ekstremıstik uıymdy qarjylandyrý" baptary boıynsha kúdikke ilinip, mamyr aıynda qamalǵan. Sońǵy ret onyń qamaý merzimi 20 qazanǵa deıin uzartylǵan. Tanymal marafonshy, bılik synshysy, azamattyq belsendi Marat Jylanbaev taǵylǵan aıyptardy joqqa shyǵarǵan. Quqyq qorǵaýshylar qaýymdastyǵy onyń isiniń saıasılanǵanyn aıtyp, ony "saıası tutqyn" dep tanyǵan.
Astanada tergeý ızolátorynda qamaýda jatqan belsendiniń densaýlyǵy nasharlaǵany týraly aqparat bolǵan. Advokatynyń aıtýynsha, "buǵan deıin onyń tissaýyty túsip qalǵan, qazir ol jóndetilgen". "Qazir kóńil-kúıi oryssha aıtqanda "boevoe" dedi advokat.
"Endi aıyptyń bári osy Marattyń mıtıńige shyqqany, bılikke qatysty aıtqan syndaryna qatysty. Bıyl parlament saılaýynda adamdar ony qoldap, aqsha jiberdi ǵoı. "Alǵa, Qazaqstan" partıasyn qurý boıynsha uıymdastyrý tobynyń adamdary saılaýǵa qatysamyz dep nıet bildirgen adamdardyń barlyǵyna olarǵa da túsken aqshadan járdemdesti ǵoı. Endi sony "terorızmdi qarjylandyrý" deıdi. Qaıdaǵy terorızm? Qaıdaǵy qarjylandyrý? Qarjynyń barlyǵy saılaýǵa qatysý jarnasy bar ǵoı (1 mln teńgeden astam qarajat) solarǵa ketti ǵoı. Bir tıyn da Jylanbaevtyń qaltasyna túsken joq" deıdi Meıirjan Dosqaraev.
Marat Jylanbaev bıyl kezekten tys parlament saılaýyna depýtattyqtan úmitker retinde tirkelgen. Bılik ony "erte úgit-nasıhat jasady" dep aıyptap, oǵan ákimshilik is qozǵady. Aqyry ony kandıdattar qatarynan alyp tastady.
Óziniń saılaýaldy baǵdarlamasynda Jylanbaev Qańtar oqıǵasyn tergeýdi, qantógisten zardap shekkenderge ótemaqy tóleýdi, burynǵy prezıdent Nursultan Nazarbaev pen onyń otbasyna qatysty tergeý júrgizýge shaqyrǵan.
Bılik ol tirkemek bolǵan opozısıalyq "Alǵa, Qazaqstan" partıasynyń tirkeý týraly ótinishin talaı keri qaıtardy.
Álemniń 39 elinde demokratıa belsendileri men quqyq qorǵaýshylar, advokattar men jýrnalıserdi biriktiretin World Liberty Congress úkimettik emes uıymy jýyrda "Marat Jylanbaev jón-josyqsyz ustaldy" dep tanyǵan.
