16 qyrkúıekte Atyraý oblysy Maqat aýdanynda «Zarnısa» áskerı-sporttyq oıyny bastalarda Memlekettik Gımn oryndalǵan eken. Sol kezde alǵashqy áskerı daıyndyq pániniń muǵalimi oń qolyn júrek tusyna eki saýsaqpen qoıyp, Ánuranǵa ádepsizdik tanytqan. Osyǵan oraı, Memlekettik rámizderdi nasıhattaý jónindegi ulttyq ortalyq oblystyq ishki saıasat basqarmasy men aýdan ákimine usynys joldady. Iaǵnı, Ánuranǵa qurmet kórsetpegen azamatty QR ÁQBtK-niń 458-baby («QR Memlekettik Týyn, Eltańbasyn, Gımnin paıdalaný jáne oryndaý tártibin buzý») 1-bólimine sáıkes kináli dep tanyp, ákimshilik jaýapkershilikke tartýdy surapty. 

– «E-Ótinish» júıesine tirkelgen shaǵym polısıa departamentinde qaraldy. Kináli azamat anyqtalyp, oǵan zańǵa sáıkes ákimshilik aıppul salyndy, - deıdi Jergilikti polısıa qyzmeti basqarmasynyń bastyǵy Erlan Bıǵambaev.

Osylaısha, kináli tulǵa 50 aılyq eseptik kórsetkish, ıaǵnı, 172 500 teńge aıyppul arqalap otyr. Eger ony bir apta ishinde tólep úlgerse, tek jartysyn ǵana óteıdi. Al, Memlekettik rámizderdi nasıhattaý jónindegi ulttyq ortalyǵynyń dırektory Rýslan Hamzanyń aıtýynsha, osyǵan uqsas jaǵdaı osydan tórt jyl buryn oryn alǵan eken.

– Atyraý qalasyndaǵy «Shapaǵat» destrýktıvtik dinı aǵymdardan japa shekkenderge kómek kórsetý ortalyǵynyń uıymdastyrýymen dinı birlestikter arasynda shaǵyn fýtboldan ashyq týrnır ótken bolatyn. Jarystyń basynda QR Ánurany oryndalǵan sátte oń qolyn júrek tusyna qoımaǵan, ıaǵnı, memlekettik rámizge qurmet kórsetpegen elimizdiń eki azamaty QR ÁQBtK-niń 458-baby 1-bólimine sáıkes kináli dep tanyldy. Olarǵa qatysty ákimshilik quqyqbuzýshylyq týraly hattama toltyrylyp, aıyppul salyndy, - deıdi ol.

Aıta keteıik, «Meniń Qazaqstanym» 2006 jyly 6 qańtarda resmı túrde Parlamentte talqylanyp, memlekettik Gımn bolyp bekitildi. Onyń mátinine Tuńǵysh Prezıdent tarapynan qosymsha ózgerister engizilgenin kópshilik jaqsy biledi. Ánuran aıtylǵanda jurtshylyq oryndarynan turyp, oń qolyn sol jaq keýdesine – júrek tusyna qoıady.