Qyrǵyzstan prezıdenti Sadyr Japarov "Áýeden shabýylǵa qarsy qorǵanýdyń birlesken aımaqtyq júıesin qurý jóninde Qyrǵyzstan men Reseıdiń arasyndaǵy kelisimdi ratıfıkasıalaý" boıynsha zań jobasyna qol qoıdy.

Bul týraly prezıdent saıtynda 12 qazanda jarıalandy.

"Qyrǵyzstan men Reseı arasynda áýeden qorǵanýdyń birlesken aımaqtyq júıesin qurý eki eldiń áýe keńistigin qorǵaýǵa jáne qaýipsizdigin qamtamasyz etýge múmkindik beredi", - delingen málimette.

"Bul qujat aıasynda Reseı Kant qalasynyń aımaǵyndaǵy reseılik avıasıalyq bazanyń aýdanynda áýeden shabýyldan qorǵaný komponentterin ornalastyrýdy josparlaıdy. Bul maqsatta Qyrǵyzstannyń qorǵanys mınıstrliginiń ótinishine sáıkes, Kanttaǵy áýe bazaǵa qosymsha 5 gektar jer ýaqytsha paıdalanýǵa berý boıynsha tıisti ister júrgizildi. Áýeden shabýyldan qorǵaný isterin basqarýdy qyrǵyz tarap júrgizedi, al materıaldyq-tehnıkalyq jaǵynan qamtamasyz etý orys taraptan bolady", - dedi Qyrǵyzstannyń qorǵanys mınıstriniń orynbasary Almazbek Qarasartov.

Osyǵan deıin Reseıdiń Memlekettik dýmasy Qyrǵyzstan men Reseı arasyndaǵy kelisimdi ratıfıkasıalaǵan.

Byltyr tamyzda Máskeýde Qyrǵyzstannyń qorǵanys mınıstri Baqtybek Bekbolotov pen Reseıdiń qorǵanys mınıstri Sergeı Shoıgý qujatqa qol qoıǵan.

Qyrǵyzstannyń orys áskerı bazasyna birneshe obekt kiredi. Olar "Kant" avıabazasy, Qarakól qalasyndaǵy synaý bazasy, Chaldybar qystaǵyndaǵy baılanys túıini, Maılýý-Sýý qalasyndaǵy avtonomdy seısmıkalyq pýnkt. Bul nysandardyń bári 2012 jyldan beri Qyrǵyzstan men Reseıdiń birikken orys bazasyna biriktirildi.