Elimizdegi «Básekege qabiletti kóshbasshylar – ulttyq chempıondar» memlekettik baǵdarlamasynyń dıagnostıkalaý kezeńi aıaqtalyp, «myńnan tulpar, júzden júırik» jeńimpazdar anyqtaldy.

Astanada ótken atalǵan aýqymdy jobany talqylaý otyrysynda «Báıterek» holdıńiniń basqarma tóraǵasy Qýandyq Bıshimbaev nazardaǵy 28 kompanıanyń 7-eýi alǵa oza shapqanyn málimdedi.

Osymen úshinshi ret shymyldyǵyn túrgen basqarýshy komıtet otyrysyna QR Pre­mer-mınıstriniń birinshi orynbasary Baqytjan Saǵyntaev, Qazaqstannyń Ult­tyq kásipkerler palatasy prezıdıýmynyń tóraǵasy Tımýr Qulybaev, ulttyq ekono­mıka mınıstri Erbolat Dosaev, otandyq bıznes-qaýymdastyq ókilderi jáne ózge de múddeli taraptar qatysty. 
 – Búgingi tańdaǵy baǵdarlama jemisi shyn qýantady. Bizdiń «Atameken» palatasy da tıisti jumysqa belsendi atsalysyp, nátıjeli órbýine óz úlesin qosty. Kóptegen kompanıalar qatarynan otyzǵa jýyǵy irik­telip alynyp, olardaǵy ahýal jiti zerde­lenip, taldandy. Jalpy, qajetti tizimdegi zor úmit artylǵan birqatar kásip­oryndardyń ósim áleýeti baıqalady. «Báıterek» holdın­gimen birlese otyryp atqarǵan oń sıpattaǵy yntymaqtastyqty ári qaraı da jalǵastyrý kerek dep oılaımyn, – dep atap ótti jıyn ba­synda Ulttyq palata jetekshisi T.Quly­baev.
Elbasy Nursultan Nazarbaevtyń bastamasyn júzege asyrý aıasynda sulbasy túzilgen ıgilikti is barysynda, Qazaqstanda aımaqtyq jáne álemdik dárejedegi, básekege qabiletti, eksporttyq baǵytta qaýqarly shı­kizatqa táýeldilikten tys salany qalyp­tastyrý kózdelýde. Mundaı kásip ıelerine «Báıterek» ulttyq basqarýshy holdıńi» AQ múmkindikterin qoldaný arqyly qarjylyq qoldaý qoljetimdi bolmaq. Anyǵyraq toqtalsaq, bul bankaralyq nesıelendirý, lızıńtik mámilelerdi qarjylandyrý, paıyzdyq mólsherlemelerdi sýbsıdıalaý, nesıelerge kepildik berý, eksporttyq saq­tandyrý, ınovasıalyq granttar syndy qýatty tetikter bolyp otyr. Sonymen qatar erekshe súzgiden súrinbeı ótken myq­tylar álemge belgili McKinsey&Company ha­lyqaralyq konsaltıńtik kompanıa­synyń naqty qundy keńesterine ıek artyp, bas­qarýdyń úzdik úlgilerimen tanysa almaq. Taǵy bir mańyzdy jaıt, baǵdarlamaǵa qaty­sýshy-kompanıalardy demeýde, memlekettik mekemelermen ákimshilik kedergilerdi joıýda tyǵyz jumys istelip, shash-etek sharýa bir arnada úılestirilmek. 
– Dıagnostıkalaý sátinde aıqyndalǵan bastamalardy tyndyrý arqyly shıkizattyq emes eksport 2018 jylǵa taman 38 mlrd teńgege jetip, baǵdarlamada baǵyn synaýshy jaqtardyń qosymsha kirisi 173 mlrd teńge kólemine kóteriledi dep kútilýde. Onymen birge, 5 myń jańa jumys orny ashylady dep te boljanýda. Tańdalǵan kompanıalardyń ishinen, qazirdiń ózinde jeteýi «chempıon» ataǵyna ábden laıyq. Olardyń saýda somasy qomaqty, ónimderin qarqyndy túrde shekara asyrýda ári qarjylyq-marketıngtik me­nedj­­menti saýatty júrgizilýde, – dep baıan­dady «Báıterek» UBH basshysy Q.Bıshim­baev.
Sonymen, «RG Brands», «Eurasian Foods Corporation», «Agroprodýkt», «Baıan sulý», «Maslo-del», «Alageum Group», «Alina» ispetti sharýasyn órge dóńgeletken kompa­nıalarǵa aıryqsha kóńil bólinýde. Mysalǵa, emalmen syrlanǵan vana, qoljýǵysh jasaýdyń sheberi «Santehprom» JSHS stra­tegıasynda akrıldengen ónimge aýy­syp, marketıńtik qyzmetti jańǵyrtý, Ońtústik jáne Batys Qazaqstan óńirlerindegi is-qımyldy shıratý, jylytý júıelerin satýdy jıiletý, tipti avtomobıl ónerkásibine bólshekter jetkizý arqyly Reseıdegi saýda kórigin qyzdyryp, elimizdegi ımportty yǵystyrý kózdelýde. «Alageum Group» JSHS Shymkent qalasynda 220 jáne 500 kVt kerneýlik kúshtik transformatorlar zaýytyn salýǵa, «birtutas tereze» ustany­mynyń tusaýyn kesýge qulshynsa, «Baıan sulý» AQ dámi til úıiretin kondıterlik ónimimen Ortalyq Azıany jaýlap almaq raıda. 
 – Kondıterlik salada rasynda Ulttyq chempıondy jarq etkizýge bolady. Sebebi bul – edáýir úlken naryq. Búginde elimizdegi 800 mıllıon teńgelik kondıterlik ónimderdiń ókinishke qaraı, 420 mln bóligi syrttan tasymaldanatyn ımport. Sondaı-aq kórshi Ózbekstan men Tájikstanda, Aýǵanstanda kondıterlik óndiris nashar damyǵan. Reseı naryǵyn da umytpaǵan jón. Bizdiń esepteýimizshe, 276 myń tonna eksporttyq múmkindik 700 mln dollarǵa teń. Eksportty damytsaq, aına­lymdy 1,5 mlrd dollarǵa aparýǵa shamamyz jetedi, – dep pikirin bildirdi qyzyqty salys­tyrmaly derek boıynsha qazaqstan­dyqtar táttige nannan góri eki ese shyǵyn­dalatynyn aıtqan Qazaqstan kondıterler qaýymdastyǵynyń vıse-prezıdenti Álıhan Talǵatbek.
Áńgimeni túıindeı ketsek, joǵaryda kel­tirilgen baǵdarlamanyń alǵashqy satysynda agroónerkásiptik keshen, mashına jasaý, qurylys zattary óndirisi sekildi úsh baǵytta jyldyq tabys, jumys oryndar sany, orta­sha paıda tabý deńgeıi, eksport úlesi syndy tarmaqtarda kórsetkishi kóterińki nysandar suryptalǵan. Ekinshi dıagnos­tıkalaý belesinde bıznesti ári qaraı jaqsartýdyń negizgi baǵdarlary belgilenip, jergilikti kom­panıalarǵa 100-den astam usynys ázir­lengen. Endigi bıik murat, «Báıterek» hol­dıngi men McKinsey&Company mamanda­rynan quralǵan sarapshylar toby ár kásiporynǵa arnaıy daıyndaǵan sáıkes dúnıelerdi is júzinde engizý. Konsýl­tasıalyq, qarjylyq, ınstıtýsıonaldyq qoldaý amaldary taǵy bar.
McKinsey&Company bilikti qyzmet­kerleri paıdalanymdaǵy jáne jańa ónim­der marketıńin kúsheıtý, ónim jelisiniń órisin uzartý, keleshegi jarqyn naryqtarǵa batyl qulash silteý, óndiris ónimdiligine oń reńk berý, personaldy basqarý men uıymdastyrý qurylymynyń kókjıegin keńeıtý áreket­terimen bilek sybana aınalyspaq. Al mem­lekettik oryndarǵa adal da ashyq básekeni, sertıfıkasıa rásimderinen ótýdi jeńil­detýdi, ishki jáne syrtqy saýda ortala­ryna shyqqanda otandyq bıznes ókilderin qol­tyq­tan demeýdi qarastyratyn 43 shara usy­nylǵan. Qamqorlyqqa ilikken bastamalardy kádege jaratýdy qarjylandyrýda, aǵym­daǵy jyldyń sońyna deıin damý ınstı­týtta­ryndaǵy qoldanystaǵy quraldar sheń­berinde qorlandyrýdyń ońtaıly nusqalary salmaqtalyp, bekitilmek. 

Derekkóz: Aıqyn-aqparat