Ol – qazir sýperchempıon. Judyryǵy jahannyń tizesin dirildetken nokaýtshy. Ol – qazir juldyz. Ony barlyǵy biledi. Ordabuzar jasynda qamal alǵan bylǵary qolǵap sheberi. Ol – patrıot. Ol – Qazaq Eliniń, ultynyń maqtanyshy. Ol – Gennadıı Gennadııuly Golovkın (GGG). Búgingi tańda osynshama tolaǵaı tabystarǵa kenelgen boksshynyń joly qalaı bastaldy? Bul týraly oılanyp kórdińizder me? Qaraǵandylyq boksshy álemdik boks serıasynyń shyńyna qalaı shyqty? Sol týraly jazarymyz bar, nazaryńyz aýyspasyn.

Gennadıı joly

            Áýesqoı boks

            Gennadıı Golovkın 1981 jyly sáýirdiń 8-inde Qaraǵandy qalasynda dúnıege kelgen. Bile bilseńizder, ol – egizdiń syńary. Gennadıı syńar baýyry Maksımmen boks jolyn birge bastaǵan. Maksım de jaqsy judyryqtasqan desedi. Biletinderdiń aıtýynsha, óte daryndy boksshy bolǵan. Biraq túrli jaǵdaıǵa baılanysty sál erterek úlken sporttan qol úzip ketken. Qazir ol Genaǵa qoldaý kórsetip, bapkerler sapynda júr. Ózin shyńǵa kóterip, qarsylastaryn shyńyraýǵa túsirip júrgen boksshy óziniń sporttyq mansabyn áýesqoı bokstan bastaǵan.

            Áıgili bylǵary qolǵap sheberi áýesqoı boksqa 11 jasynda keledi. Qazaqstannyń jeti dúrkin chempıony. 2000 jyly jastar arasynda álem chempıony atanady. 2001 jyly Shyǵys Azıa oıyndarynyń, 2002 jyly Azıa oıyndarynyń chempıony atanady. Talanatty hám daryndy boksshy 2004 jyly Afına qalasynda ótken Olımpıada oıyndarynyń kúmis júldegeri atanady. Fınaldyq kezeńge deıin qarsylastaryna ese jibermegen jerlesimiz aqtyq synda orys boksshysy Gaıdarbek Gaıdarbekovten 18:28 esebimen ese jiberip alady. «Kelesi olımpıada oıyndarynda altyn alatyny sózsiz, áli jas qoı» degender kóp-tin sol ýaqytta. Alaıda Golovkınniń joly kúrt ózgerdi. Áý basta onyń bul bastamasyn qoldaýshylar az bolǵanymen, búginde Golovkın baǵytynyń anyq ekenin dáleldedi.

            Golovkın – ıntellıgent boksshy. Onyń mádenıeti, qazaqqa tán sabyrly, qońyr minezi álem jýrnalıserin tań qaldyrýda. «Áýesqoı boks Golovkınge ne berdi?» degen saýal eriksiz týýy múmkin. Jaýap – tárbıe. Qazirgi kásibı boks sheberlerine jetispeı jatqan tus – bul. Dórekilik, qarsylasyn syılamaýshylyq. Gena bul ádetten aýlaq. Artyq sózi joq. Áýesqoı boks Gennadııdi osyǵan úıretti. «Borat» fılminen keıin elimizdiń ımıji birshama quldyraǵany anyq. Alaıda esh negizge súıenbeı túsirilgen bul fılmge jalǵyz Gennadıı Golovkınniń pań turyp, bergen jaýaby jetkilikti. Mádenıet – qazaqqa tán, dilmen egiz ósken uǵym.

            Kásibı boks

            Gennadıı áýesqoı bokstan jeter jetistikterge jetip, alaryn aldy. Sonymen, 2006 jyly Gennadıı Golovkın áýesqoı bokstan kásibı boksqa aýysatynyn jarıa etti. Atalǵan jyly orta salmaqta 8 jekpe-jek ótkizip, segizin de merziminen buryn jeńispen aıaqtady. Qarqyndy damyp kele jatqan boksshynyń aıaq alysy kópshiliktiń nazaryn ózine aýdyrdy osylaı. 2009 jyly 12 raýndtyq alǵashqy jekpe-jeginde brazılıalyq boksshy Djon Anderson Karvalony alǵashqy raýndta nokaýtqa túsirip, WBA dárejesi boıynsha álem chempıony atandy. Bul nátıjeli jeńisteri Golovkındi aǵaıyndy Klıchkolar qurǵan «K2 Promotions» promoýterlik kompanıasynyń quramyna qosady. Bir jyl ótken soń Gennadıı búkilálemdik kásibı boks serıasynyń IBO beldigin jeńip alady. Munyń orta salmaqta judyryq túıistirip júrgen boksshylar úshin jańalyq bolǵany anyq. Endi olardyń taýlaryn shaǵyp, tuǵyrlarynan taıdyratyn tegeýrindi qarsylas shyqqany belgili boldy. 2012 jyly jerlesimiz jeńilistiń dámin tatyp kórmegen Reseı boksshysy Mıhaıl Makarovty jeńip tynady. Artynsha sol kezdiń myqtysy sanalatyn Dmıtrıı Pırogti jekpe-jekke shaqyrdy. Alaıda, bul judyryq túıistirý júzege aspady. Kezdeser kún jaqyndaǵanda Pırog arqasynan jaraqat alyp, kezdesýden bas tartýǵa májbúr boldy.

            Bul josparlanǵan kún Gennadıı úshin jekpe-jeksiz ótpedi. Pırogtiń ornyna Golovkınniń sport mansabyndaǵy eń qaýipti qarsylasy Gjegosh Proksamen kezdesý ótti. Proksa da osal emes-tin. Ol Golovkınge deıin 29 jekpe-jek ótkizip, 28-inde jeńiske jetken. Alaıda Genanyń arynyna ol da shydamady. Atalǵan jekpe-jek Golovkınniń áıgili NVO telearnasynda kórsetilgen kezdesýi boldy. Álem Golovkın degen esimdi tanı bastady.

            Búgingi kúnde Gennaıdıı Golovkın kásibı boks serıasynda 33 jekpe-jek ótkizgen. Onyń barlyǵyn jeńip, 30-yn merziminen buryn aıaqtaǵan. Qazirgi tańda eń úzdik nokaýter atanyp otyr.

            Lemeden ne kútemiz?

            Golokınniń kelesi qarsylasy Davıd Leme. Kanadalyq boksshy. Boksshylar reıtıńisinde 6-shy orynǵa turaqtaǵan. Sporttyq mansabynda 36 jepe-jek ótkizip 34-de jeńiske jetken. Onyń 31 nokaýtpen aıaqtalǵan. 2- ret jeńilis tapqan. Osal  qarsylas emes. Qarqyny da keremet.

            Búgin Golovkın men Leme rıngke shyǵar aldyndaǵy pres-konferensıaǵa qatysqan bolatyn. Munda kanadalyq sportshy eger Golovkındi alǵashqy raýndtarda qulatatyn bolsam, esh tań qalmaımyn dep málimdedi. Al, óz kezeginde Golovkınniń bapkeri Abel Sanchez Lemeni Golovkınniń eń qaýipti qarsylasy emes dep málimdedi.

            Endi barlyq suraqqa jaýapty rıng beredi. Al, Golovkındi qulatamyn degenderdiń bokstan keıingi túrin biz jaqsy bilemiz. Esterińizge sala keteıik ekeý -ara kezdesý 17 qazanda (bizdiń ýaqyt boıynsha 18 qazan)ótetin bolady.

Aıan Azamat