Jazýshylar odaǵynyń barynda kofe iship otyrmyz.

Aty-jóni esimde joq, bir jigit Asekeńnen (Asqar Súleımenov):

– As-eke, qazaq ult bola ma, bolmaı ma? – dep surady. Asekeń ári kofesin iship, ári qolyndaǵy gazetten kóz almaı otyryp:

– Bolady. Biraq bolmaıdy, – dedi de gazetten kózin almaı otyra berdi. 

Biz túk túsingen joqpyz.

– Aseke, taratyp aıtsańyzshy. Ne ol – bolady, biraq bolmaıdy degen. Nege bolady, nege bolmaıdy.

Asekeń suraq qoıyp otyrǵan jigitke bajyraıyp bir qarady da:

– Soǵan mılaryń jetpeı tur ma? Bolady, eger rýǵa bólingenin qoısa. Biraq, qazaq rýǵa bólingenin qoımaıdy. Dúnıede eki-aq qazaq qalǵan bolsa, olar bir-biriniń rýyn surap baryp óledi. Demek, olar ult bola almaıdy.

(Qazaqstannyń halyq jazýshysy Dýlat Isabekovtyń 

"Dýlat Isabekovtyń anekdottary" kitabynan).