Almatyda halyq kóbeıgen saıyn qoǵamdyq kóliktiń tapshylyǵy sezilip jatyr. Búdjetten taǵy 46 mlrd teńge qarastyrylyp, taǵy 600 avtobýs satyp alý josparlanypty. Qoldanystaǵy kólikterdiń birazy «avtobýs zıratyna» tastalyp, ornyna jańasyn almaq.

«Avtobýs zıratynda» 800-den astam avtobýs tur. Eń eskisi 2010 jyly, jańalary 2018 jyly ákelingen. Ne degen sapasyz tehnıka deseńizshi. Bul avtobýstar júrýge jaramsyz jáne jóndeýge kelmeıdi eken.

"Almatyelektrotrans" JSHS bas dırektorynyń orynbasary Abylaıhan Omarhan satyp alynatyn avtobýstardyń jóndeýge jaramsyz ekenin aıtqan. Aldaǵy ýaqytta bul tehnıkanyń bári esepten shyǵarylady. LıAZ markaly 200-deı avtobýs 2017-18 jyldary satyp alynǵan. Onyń 154 danasy Almaty oblysyna berilgen bolatyn.

Qyzyq, jyl saıyn avtobýs satyp alýdan jalyqpaıdy, biraq sonda da qashan qarasań avtobýs tapshy. Saıasatker Sanjar Boqaev muny júıeli jemqorlyq dep baǵalaıdy:

– Baýyrjan Baıbek Almatyǵa ákim bolǵan kezde avtobýs jáne troleıbýs avtoparkin «Green bus sompany» atty shymkenttik kúmándi bir kompanıaǵa tabystaǵan. Keıin tramvaı jolyn joıyp, 1113 jańa avtobýsty joǵary baǵamen satyp aldy. Quny 83 400 dollar suratyn kóliktiń baǵasy bizge kelgende belgisiz sebeppen 164 000 dollar bolyp ketedi. Solaı 200 avtobýs eki ese qymbat baǵaǵa satyp alyndy. 2019 jyly bular esepten shyǵarylyp, sol jyly qaıtadan aldyrtady. Sol jap-jańa avtobýstar da eki jyldan keıin jaramsyz dep tabylǵan. Kompanıa keıin bankrot dep tanylyp, úkimetke bir tıyn da qaıtarmady. Sheteldik tájirıbege súıensek, bir avtobýs keminde 7 jyl qyzmet etýge jaraıdy. Al bizde jóndeýge berilmeı, tikeleı turaqqa jiberiledi, deıdi ol.