Abaı atyndaǵy Respýblıkalyq mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn orta mektep-ınternatynda «KazAgroFeed» kompanıasynyń demeýshiligimen dástúrli V respýblıkalyq «Dilmar» sheshendik óner baıqaýy ótti.

Ulttyq rýhanı muramyzdy ulyqtaý maqsatynda uıymdastyrylyp jatqan kezekti sóz dodasyna elimizdiń 12 oblysy men 3 iri qalasynan (Almaty, Astana, Shymkent) jáne Nazarbaev zıatkerlik mektebinen 24 oqýshy qatysyp, aqyl-oıy men sóıleý sheberligin synnan ótkizdi.

Baıqaý oqýshylarǵa sóz óneriniń ereksheligi men júıeli sóz saptaý sharttaryn meńgertý, saýatty ári jatyq sóıleý daǵdysyn – sóıleý mádenıetin júıeleý, sóz óneriniń tarıhı-mádenı bolmysyn taný, sóz qundylyǵyn baǵalaý, ulttyq tárbıe berý, sol arqyly ádebı til normasyna sáıkes memlekettik tildi qoldanýdyń jańa deńgeıin qalyptastyrýǵa baǵyttaldy.

Respýblıkalyq baıqaýǵa «Daryn» RǴPO-nyń Pedagogıkalyq sheberlik jáne psıhologıalyq qyzmet bóliminiń basshysy Baqtıar Saıran Bákenuly qatysyp, quttyqtaý sóz sóıledi. Aqyn, sazger, shejire-sheshen, ult janashyry, Talǵar aýdandyq memlekettik tildi oqytý ortalyǵynyń dırektory Dárkembaı Káminur Tálimuly, Súleımen Demırel Ýnıversıtetiniń profesory, ǵalym Jumaqaeva Bereke Dáýlethanqyzy jáne M. Áýezov atyndaǵy Ádebıet jáne óner ınstıtýtynyń Abaıtaný jáne jańa dáýir ádebıeti bóliminiń ǵylymı qyzmetkeri, PhD doktorant Jumataeva Aıdana Nyshanǵalıqyzy qazylyq jasap barlyq qatysýshyǵa baǵyt pen shabyt berdi.

Sóz dodasyna qatysýshylar ózara juptasyp, jerebe negizinde tańdalǵan taqyryptar boıynsha oı órbitti. Olardy baǵalaýda oı qısynyn saqtaı otyryp, jyldam ári saýatty pikir bildirý, sóz tapqyrlyǵy, logıkalyq júıelik, sóz kórkemdigi, til tazalyǵy, taqyrypty asha bilýi syndy krıterııler negizge alyndy.
Nátıjesinde 8 oqýshyǵa júldeli oryn, 4 oqýshyǵa Arnaıy júlde tabystaldy. 4 oqýshy – Shaıkybekova Nuraı (Pavlodar oblysy), Aýǵanbaı Ásel (Mańǵystaý oblysy), Nurjanqyzy Aqerke (Almaty oblysy), Áıgerim Arslanbekqyzy(Abaı atyndaǵy RMMI) Arnaıy júldeni (20 myń teńge); 4 oqýshy – Abdıhaı Janbolat (Shymkent qalasy), Nubaraquly Abaı (Almaty oblysy), Ondasynqyzy Ásıa (Aqtóbe oblysy), Asqarqyzy Aqbota (Jambyl oblysy) júldeli İİİ oryndy (40 myń teńge); 2 oqýshy – Japas Aıaýlym (Abaı atyndaǵy RMMI), Úmbetqalı Bekarys (Batys Qazaqstan oblysy) júldeli İİ oryndy (70 myń teńge); Jabaǵıeva Úmmigúlsim (Semeı qalasy, Nazarbaev Zıatkerlik mektebi) júldeli İ oryndy (100 myń teńge) aldy.

Al bas júlde men(150 000₸) arnaıy kýbokty Abaı oblysy, Aıagóz aýdanyndaǵy #10-gımnazıanyń 10-synyp oqýshysy, respýblıkalyq “Dilmar” sheshendik ónerdi damytý klýbynyń múshesi, “Dilmar-Aıagóz” sheshendik óner úıirmesiniń jetekshisi Túrsálim Álı Muhtaruly ıelendi. Sonymen qatar, qalǵan oqýshylarǵa sertıfıkattar men kitaptar tartý etildi.

Joba avtory: respýblıkalyq Abaı mektebiniń muǵalimi, jýrnalıs Jarqyn Sálenuly.