Resmı málimetter boıynsha jyl basynan beri adam saýdasyna qatysty 124 qylmys tirkeldi. Atap aıtqanda:

• adam saýdasy – 27 (sonyń ishinde kámelet jasqa tolmaǵandarǵa qatysy 22 qylmys);
• jezókshelikpen aınalysýǵa tartý – 10 (sonyń ishinde kámelet jasqa tolmaǵandarǵa qatysy 5 qylmys);
• adam aǵzalaryn satý – 4;
• qanaý maqsatynda bas bostandyǵynan zańsyz aıyrý – 4;
• prıtondardy ustaý, jeńgetaılyq – 79;

Uıymdasqan qylmysqa qarsy kúres departamentiniń bastyǵy Qanat Nurmaǵambetovtyń aıtýynsha, jaqynda kezekti ret "STOP trafık" jedel sharasy ótken. Nátıjesinde 39 qylmys anyqtaldy. Eki kelinshek týǵan balasyn satqysy kelgen. Adam satý faktisi Almaty oblysy men Shymkent qalasynan anyqtaldy.

Oblystyń 24 jastaǵy turǵyny júktiliktiń jetinshi aıynda áleýmettik jelide balany satý týraly habarlandyrý jarıalap, satyp alýshylardy izdeýmen aınalysqan. Sońynda ol balalary joq erli-zaıyptylardy taýyp, olarmen kelisim jasaǵan. Satyp alýshy tarap áıeldiń nesıelik qaryzdaryn ótep bermek bolǵan. Bul fakt “Kámeletke tolmaǵandar saýdasy” baby boıynsha tirkeldi, sotqa deıingi tergeý bastaldy. Kúdikti qamaýǵa alyndy.

Shymkentte jańa týǵan náresteni saýdalaýdyń taǵy bir faktisi tirkeldi.

 – Uıymdasqan qylmysqa qarsy kúres basqarmasynyń qyzmetkerleri 23 jastaǵy jas áıeldiń óz balasyn satpaq bolyp, satyp alýshylardy izdeýmen aınalysqanyn anyqtady. Ol deldal arqyly basqa oblystyń 45 jastaǵy turǵynyn tapqan. Fakt Qylmystyq kodekstiń 135-baby boıynsha tirkeldi, sotqa deıingi tergeý bastaldy. Bala sábıler úıine ornalastyryldy. Kúdikti qamaýǵa alyndy, – dedi QR İİM uıymdasqan qylmysqa qarsy kúres departamentiniń bastyǵy Qanat Nurmaǵambetov.

Al Oral qalasynda 35 jastaǵy áıel úsh aı boıy kámelet jasqa tolmaǵan qyzdy jezókshelikpen aınalysýǵa májbúrlegen. Barlyq aqshany óz qaltasyna basqan. Qazirgi kezde qylmystyq is qozǵaldy. 17 jastaǵy qyz týǵan-týystaryna tapsyryldy.