Telehıkaıa túsirilimi Almaty oblysy men Ózbekstan Respýblıkasyndaǵy Hıýa, Ferǵana, Buqara qalalarynda ótti. Týyndyny qazaq, ózbek, qyrǵyz kınogerleri birigip, túsirgen.

Serıalda Qorqyttyń bala kezi, bozbala shaǵy,eresek kezi men qart bolǵanyna deıingi ómir joly kórsetiledi. Túrli tylsym oqıǵa qamtylǵan serıaldy túsirýge shamamen 2 jarym jyldaı ýaqyt ketken.

Telehıkaıa sújetinde Qorqyttyń dúnıege kelýi, balalyq shaǵy, jetkinshek kezinen sáýegeı, abyz retinde qalyptasý joly kórsetiledi. Telehıkaıa senarıi álemdik deńgeıde zerttelgen «Qorqyt ata» kitabyna jáne halyq arasyndaǵy ańyzdarǵa negizdelgen.

Jobanyń tarıhı keńesshisi – etnograf Berik Júsip. Redaktory – Bolat Jetekbaı. Prodúseri – Sholpan Batyrbaeva. Qorqyttyń ár kezeńdegi rólderin Dinıslam Nurmaǵambet, Ádil Ahmetov jáne Aıdos Bektemir somdaıdy. Sonymen qosa, negizgi tarıhı rólderdi Erkebulan Daıyrov, Zarına Karmen, Medǵat Ómiráli oınaıdy. Serıalda qyrǵyzdyń ataqty manasshysy Rysbaı Isaqov pen tanymal akter Askat Sýlaımanovtyń rólderi bar.

 Eske sala keteıik, Rejıser Qanaǵat Mustafın bastaǵan shyǵarmashylyq top 4 bólimnen turatyn tarıhı telehıkaıanyń túsirilim jumystaryn ótken jyldyń qyrkúıek aıynda bastaǵan. Ózbekstannyń Hıýa qalasyndaǵy tarıhı kadrlar qańtar aıynda túsirildi.

Tarıhı fılm 16, 17 jeltoqsan kúnderi saǵat 14:40-ta Qazaqstan ulttyq arnasynyń efırinen kórsetiledi.