Qazaqstandaǵy baılanys operatorlary qazirdiń ózinde tutynýshylaryna tarıf quny ósetinin eskertip jatyr.

Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın bul jaıynda: «Operatorlar tarıftik saıasatyn derbes júrgizedi jáne halyqaralyq trafıkti operatorlardyń ózi tóleıdi. Iaǵnı, operator ózine aqsha almaıdy, ol sizdiń aqshańyzdy alyp, halyqaralyq trafıkti sol jerden tóleıdi. Sonyń ishinde osy trafıkke qyzmet kórsetetin jabdyqqa jáne t.b. qyzmetter bar», – dep málimdedi.

Qoǵam belsendisi, saıasatker Sanjar Boqaev baılanys operatorlary tarıf saıasatyn ózderi belgileıdi degen mınıstrdiń sózimen kelispeıdi. «Sonda tarıf baǵasyn 5 ese kóbeıte ala ma? Bul qısynsyz. Antımonopolıalyq komıtet qaıda?» dep suraý saldy ol.

– Mınıstr baılanys operatorlaryn jınap, 3 máseleni qozǵaýy kerek edi. Birinshiden, dúnıejúzinde sońǵy bes jylda ınternet baǵasy ósken joq, qaıta arzandaı tústi. Qazir 1 GB – 2,61 dollar turady. Bul 2019 jylmen salystyrǵanda 4 ese arzan. Buǵan teńge turaqtap, dollar baǵamy birshama tómendegenin qosaıyq. Kelesi kezekte, mobıldi ınternet pen tarıfterdi qymbattatýdyń negizsiz ekenin aıtý qajet. «Ksell» AQ-nyń esebinde 2022 jyly kelisimsharttardan 219,002 mln dollar túskeni, jyldyq paıdasy 84,963 mln dollar bolǵany kórsetilgen. Demek, baǵa kerisinshe, arzandaýy tıis, – deıdi.

Mobıldi ınternettiń jyldamdyǵy jaǵynan Qazaqstan álemde 67-shi orynda. Mınıstr “basyp ozǵanbyz” dep maqtanǵan Japonıanyń ınterneti bizden kósh ilgeri.

Baǵdat Mýsınniń ınternet máselesine kelgende ózine shań jýytpaı, artyq sóılep qoıatyny bar. Keshe «Internetti únemdeńder» dep aqyl aıtty. Mádenıetti halyq aıyna 15-20 GB emes, odan az ınternet tutynýy kerek-mys.

Mınıstr «Ýáde» baǵdarlamasyna bergen suhbatynda bylaı kósilgen:

– Meniń oıymsha, ǵalamtordy bir saǵattan artyq qoldanbaý kerek. Mysaly, adam 12 saǵattyń 8 saǵatyn jumysta ótkizse, qalǵan 4 saǵattyń bir bóliginde ǵana ınternet qoldansyn. Tipti jumysta da ǵalamtordy paıdalaný úlken paıda bermeıdi, depti.

Áı, deımiz. Sonda prezıdent Toqaev tapsyrǵan sıfrlandyrý qaıda? Qazir ınternetsiz ómir joq ekenin bilmeıtin Mýsınniń ózi qaı ǵasyrda júr?