Endi motor kólemi 1000 tekshe sm-den aspaıtyn jeńil avtomobıl ákelý úshin 276 900 teńge tóleýge týra keledi. Al motory 2000 tekshe sm-ge deıingi mashına úshin – 646 100 teńge, 3000 tekshe sm-ge deıin 923 000 teńge tóleısiz. Kólemi 3-ten asatyn mashına úshin alym 2 122 900 teńge bolady!

Eń qyzyǵy, kredıtke malynyp alǵan bul aqshańyz Andreı Lavrentev, Nurlan Smaǵulov, Asqar Mamın, Álıa Nazarbaeva sıaqty baı-manaptardyń qaltasyna ketedi, deıdi «Net ýtılsborý» qozǵalysynyń jetekshisi Sanjar Boqaev.

Onyń esebinshe, ýtıl alymynan memleketke 24,1 mlrd dollar ekonomıkalyq zaqym keldi. Ýtıl alymy engizilgennen beri 8 jylda qazaqstandyqtardan 900 mlrd teńge jınalǵan. Biraq áli kúnge deıin sol «ýtılmen» aınalysatyn bir de bir kásiporyn iske qosylmady.

– Ýtıl alymy dep jınaǵan aqshanyń bárin olıgarhtarǵa beredi. Osy alym engizilgeli kólik baǵasy 400%-ǵa deıin ósti. Sonyń kesirinen halyqtyń deni ábden eskirgen kólikpen júr. 2015 jyly avtoparktiń ortasha jasy 12 jyl bolsa, qazir 22 jyl boldy. Úkimettiń bul alym avtoparkty jańartyp, ekologıany jaqsartýǵa kómegin tıgizedi degeni jalǵan bop shyqty. Qazir Qazaqstan álem boıynsha eń las 30 eldiń tizimine enip otyr. Bir kóliktiń ýtılızasıasyna bar-joǵy 41500 teńge jetkilikti. Nıderlandta 45 evro, Japonıada 100-200 dollar, Ulybrıtanıada 50-80 evro jumsalady. Bizde kólik túgili áli bir kombaın ýtılızasıadan ótken emes, deıdi ol.

Ýtılızasıa dep salynǵan Qaraǵandydaǵy jalǵyz zaýyt jumys istemeıdi. 2017-2019 jyldary alynǵan LıAZ avtobýstary alymy tólegenine qaramastan «zıratta» shirip jatyr. Jetigennen jalǵa jer alýǵa ákimdik 324 mln teńge bólgen.

 – Ýtıl alymyn engizerde úkimet ózimizde qurastyrylǵan avtokólikter arzan bolady dep sendirdi. Biraq 2023 jyly bizde shyǵarylǵan Kia Sorento kóligi 24 mln teńge tursa, dál sondaı kólik Grýzıada 16 mln teńge turady. Bul qalaı? Olarda nege 8 mln teńgege arzan, ekonomıkalyq logıka qaıda, degen saýal qoıady saıasatker.