Bul týraly 90-maýsymnyń ashylýyna oraı ótken baspasóz máslıhatynda Qazaq memlekettik M.Áýezov atyndaǵy akademıalyq drama teatrynyń dırektory QR Eńbek sińirgen qaıratkeri Erlan Bilál málimdedi. Onda jurtshylyqqa ótken maýsymdaǵy teatr jumysy men jańa josparlar tanystyryldy. Bul týraly «Qamshy» portaly habarlaıdy.

• Teatr jańa maýsymǵa zor jetistiktermen jetip otyr. Bıyl ujym respýblıkalyq aýqymdaǵy birneshe mádenı is-sharalarǵa qatysty. 11- qyrkúıek kúni elýden asa akterimiz Elorda tórinde Qazaq handyǵynyń 550 jyldyǵyna oraı «Máńgilik el» teatrlandyrylǵan qoıylymyna qatyssa, kúni keshe Taraz qalasynda ótken mereıtoılyq saltanatta J. Erǵalıevtiń «Qıly zaman» shyǵarmasy jelisindegi jańa qoıylymdy jurtshylyq nazaryna usyndy. Shyǵarmashylyq ujymnyń bul eńbegi memleket basshylyǵy, qalyń kórermen tarapynan zor baǵaǵa ıe boldy, - dedi jýrnalıserge teatr basshysy, QR Eńbek sińirgen qaıratkeri Erlan Bilál.
• 

Teatrdyń bıylǵy maýsymy rejıser, QR halyq ártisi E. Obaev sahnalaǵan «Abaı» tragedıasymen ashyldy. Qoıylymdaǵy Abaı rólin QR Eńbek sińirgen qaıratkeri E. Bilál, Áıgerim beınesin QR Eńbek sińirgen qaıratkeri D. Júsip somdady.

Baspasóz máslıhatynda, sonymen qatar, jyl sońyna deıin «Qıly zaman» qoıylymynyń sahnalyq nusqasy kórermen nazaryna usynylatyny aıtyldy. «Qamshy» aqparattyq portaly tilshisiniń Alashorda úkimetiniń alda kele jatqan 100 jyldyǵyna daıyndyq barysy, osy dataǵa oraı teatrdyń shyǵarmashylyq jospary týraly qoıǵan saýalyna teatr basshysy, E. Bilál:

• Akademıalyq teatr ujymy memlekettik mańyzdy mundaı sharalardan shet qalǵan emes. Tarıhı taqyryptar bizdiń teatr repertýarynyń basym bóligin quraıtynyn barlyqtaryńyz bilesizder. Alashorda taqyrybynda jazyp júrgen dramatýrgtarmen jumys isteý josparymyzda bar. «Alash» partıasynyń 100 jyldyǵy qarsańynda memlekettik deńgeıde qoldaý jasalyp, qarjylandyrý máselesi oıdaǵydaı sheshilip jatsa, kórermenderge ondaı qoıylym usynatyn bolamyz, - dep jaýap berdi.

Akademıalyq teatr ujymy qazan, qarasha aılarynda Mınsk qalasynda ótetin Baltyq jaǵalaýy jáne TMD elderi jas teatr qaıratkerleriniń İİ Halyqaralyq forýmyna, Qyrǵyz Respýblıkasynyń «Art Ordo» Halyqaralyq festıvaline, Atyraý qalasynda uıymdastyrylatyn belgili dramatýrg, jazýshy Rahymjan Otarbaevtyń Halyqaralyq teatr festıvaline qatysatynyn aıta ketken jón.

«Qamshy» silteıdi