Qazaqstan Prezıdenti kezdesý barysynda Pýtınniń elimizge saparyna degen iltıpatyn bildirip, Astanaǵa saparyn mańyzdy oqıǵa dep atady.

“Sizdiń Qazaqstanǵa sońǵy memlekettik saparyńyz tórt jyl buryn boldy. Osy ýaqyt aralyǵynda ortaq máselelerge kózqarasymyzdy únemi ózara úılestirip, ekijaqty qarym-qatynastyń ózekti máselelerin túrli alańdarda sheship otyrdyq. Sizdiń bul jolǵy saparyńyz da osynaý kúrdeli kezeńdegi yntymaqtastyǵymyzdy nyǵaıtýǵa jáne keńeıte túsýge septigin tıgizetinine senimdimin”, – dedi Nursultan Nazarbaev.

Memleket basshysy aldaǵy 16 qazanda ótetin TMD-ǵa múshe memleketter basshylary keńesi men Joǵary Eýrazıalyq ekonomıkalyq keńes máselelerin de qozǵady.

“Búginde EAEO halyqaralyq arenada qurmet pen bedelge ıe bola otyryp, óz aıasyn keńeıtip keledi. Biz durys jolda kelemiz dep esepteımin”, – dedi Qazaqstan Prezıdenti.

Sonymen qatar, Nursultan Nazarbaev Qazaqstan men Reseıdiń ekijaqty qarym-qatynasyn damytý keleshegi týraly da aıtty.

“Biz Sochıde ózara qarym-qatynastarymyzǵa qatysty negizgi máselelerdi talqylaýǵa múmkindik aldyq, endi búgin solarǵa qatysty tıisti qujattar daıyndalyp otyr. Bizdiń qarym-qatynastarymyz “HHİ ǵasyrdaǵy tatý kórshilik jáne odaqtastyq týraly” irgeli kelisim negizinde damyp jatqanyn da aıtqym keledi. Odaqtastyq Ujymdyq qaýipsizdik týraly shartpen, al ekonomıkalyq turǵydan EAEO-nyń jarǵylyq qujattarymen bekitilgen. Qazaqstan árdaıym Reseı Federasıasynyń jaqyn ári senimdi kórshisi bolǵan, aldaǵy ýaqytta da solaı bolyp qala beredi. Bul Qazaqstan halqynyń túpki múddelerimen úndesip jatyr”, – dep atap ótti Memleket basshysy.

Pýtın óz kezeginde joǵary deńgeıdegi kezdesýler men kelissózder júıeli túrde júrgizilip kele jatqanyn atap ótti.

“Maǵan Reseı-Qazaqstan qarym-qatynasyna sıpattama berýdiń keregi joq. Bul – jaı ózara senimdi seriktestik qana emes, barlyq maǵynasynda odaqtastyq qarym-qatynas. Qazaqstan – bizdiń iri saýda-ekonomıkalyq seriktesimizdiń biri. Búginde 6 myńǵa jýyq Reseı kompanıasy Qazaqstanda jumys istep jatyr, dollarlyq ekvıvalentpen eseptegende mol kólemdegi ınvestısıa jınaqtaldy. Sizdiń tól bastamańyz – Eýrazıalyq ekonomıkalyq odaq qaryshty damyp, ekonomıkalarymyzdyń tıimdi damýyna jaǵdaı jasaýda. Biz kóptegen seriktesterimizdiń EAEO-men túrli formatta yntymaqtasý nıetinde ekenin kórip otyrmyz”, – dedi Reseı prezıdenti.

Derekkóz: Tengrinews.kz