Bilesizder, bárinen aqsha jasaıtyn saýdagerlerdiń kánigi psıholog ekenin. Qazaqtyń dańǵoı, ataqqumarlyǵyn da bilip alǵan olar sońǵy kezderi túrli-túrli marapat usynyp, saýdasynyń kórigin qyzdyryp júr.  

Bastapqyda bazarda toı-tomalaqta súıgen qonaqtaryna oıyna kelgen ataqty jazyp, usynatyn túrli marapattaý qaǵazdary paıda bolǵan edi. Odan keıin kezek dıplomdarǵa keldi. Al qazir memlekettik nagradalardyń ataýyn, keskinin aına-qatesiz kóshirip jasaıtyndar da tabylyp jatyr. Biraq bulardyń suraıtyn aqysy jalǵan marapat qaǵazdardan, árıne áldeneshe ese kóp.

Máselen, qurmetti qonaǵynyń bedelin qalyń qaýym aldynda bir kóterip tastaý úshin kez kelgen adam «Qazaqstannyń eńbek sińirgen qyzmetkeri» ataǵyn 50 myń teńgege satyp ala alady. Al «Qazaqstannyń qurmetti azamaty» tósbelgisiniń quny - 100 myń teńge.

Kúni keshe atalǵan máseleni Májilis qabyrǵasynda kótergen depýtat Amanjol Áltaev toıda aqyly ataq pen medal úlestirýge quqyqtyq turǵyda tosqaýyl qoıýdy talap etti. Sóıtken ol búginderi jalǵan ataq pen medal úlestirý trendke aınalǵanyna zor ókinish bildiretinin jetkizdi.

«Rámizderimiz men memlekettik nagradalardyń ataýyn, keskinin, keıbir elementterin qaıtalaıtyn  túsiniksiz uıymdardyń mán-maǵynasy joq orden-medaldary, jalǵan ataqtary, jaýynnan keıingi sańyraýqulaqtaı qaptap ketkeni, shyndyq. Mundaı úrdis eshkimge de abyroı ápermeıdi, kerisinshe adamdy dańǵoılyqqa, jeńil ataqqumarlyqqa ıtermeleıdi. Dabyl qaqpasqa amal joq!», degen Májilis depýtaty Amanjol Áltaev memlekettik rámizderdiń elementin qaıtalaýǵa quqyqtyq turǵyda tosqaýyl qoıý qajet dep sanaıdy.

Rasynda, myna aqsha bılegen zamanda kim kimdi aldap júrgenin ajyratyp jatatyn bolsaq, shynymen de mı ashyp, bas shatasady. Bárinen de qorqynyshtysy, adamdyqqa jat qylyq - ótirikke, jalǵandyqqa etimiz úırenip, tipti ony jaqsy kórip bara jatqandaımyz ba, qalaı?...