Qazir qazaqy naqyshtaǵy kıimdi kúndelikti kıim úlgisine aınaldyrýda otandyq sángerler tynbaı jumys isteýde. Solardyń biri - Tárbıa Aıdymbaeva kúni keshe elordada óziniń zamanaýı ulttyq kıimder toptamasyn usyndy, dep habarlaıdy Astana.tv.

Tárbıa Aıdymbaeva - qazaqtyń mádenıeti men ulttyq murasyn tórtkúl dúnıege nasıhattap júrgen belgili sánger. Onyń erekshe qazaqy kıim úlgilerin shyǵarýda 30 jylǵa jýyq tájirıbesi bar. Sángerdiń ónimderi tek Qazaqstanda ǵana emes, sondaı-aq alys-jaqyn shetelderde de joǵary suranysqa ıe.

"Búkil álemdegi elshilikter bizdi shaqyryp jatyr. Onyń ishinde Italıa, Fransıa, IýNESKO-nyń zalynda kórme uıymdastyrdyq. Pákistan qanshama elderde boldyq. Biz ózimizdiń ulttyq kıimniń qazirgi álemdik deńgeıde óziniń orny bar ekenin dáleldedik degen oıdamyn", deıdi dızaıner.

Otandyq sángerdiń tikken kıimderin elimizdegi óner maıtalmandary men sportshylar kıip júr. Olar ulttyq kıimdi tek merekede ǵana emes, kúndelikti kıip júrýdi qoldaıdy.

Qazaq brendi buǵan deıin 10 memlekette ulttyq kıim kúnin uıymdastyrǵan. Sondaı-aq Brazılıa, Pákistan, Ońtústik Koreıa jáne Eýropanyń biraz elinde kórme ótkizdi. Qazir Italıanyń 18 dúkenimen kelisimshart jasaǵaly otyr.