Búgin Májilisten depýtat, “Aq jol” partıasy fraksıasynyń múshesi  Almas Turtaev qońyraý shalyp, qýanyshty habar jetkizdi. QHR-dyń elimizdegi Elshiliginen QR Syrtqy ister mınıstrligine  «Sottylyqqa» baılanysty jaýap hat kelip túsipti. Shaýyp baryp, kóshirmesin aldyq!

Esterińizde bolsa, Májilistegi Jumys toby «Qazaqstan Respýblıkasynyń terıtorıasynda aýyr nemese asa aýyr qylmys jasaǵany úshin sottalǵandyǵy bolǵan;» dep ózgeris engizgen 49-baptyń 9)-tarmaǵy Úkimetten«aýyr nemese asa aýyr qylmys jasaǵany úshin alynbaǵan nemese ótelmegen sottylyǵy bar;» degen redaksıamen qaıtyp kelgen bolatyn. Zań jobasy Úkimet usynǵan osy nusqamen qoldanysqa ense de, báribir, turaqty tirkeýge turýda qandastarymyzdan «Sottylyǵynyń» bar ne joqtyǵy týraly «ANYQTAMA» talap etiler edi. Osy anyqtamaǵa Aldan Smaıyl aǵamyz bastaǵan barlyq Májilis depýtatattary qynjylys tanytqan. Sosyn, Májilistegi jumys tobynyń jetekshisi Gúlnár Seıtmaǵambetova apaıymyz bul máseleni kelesi otyrysqa qaldyratynyn, ol otyrysqa İshki ister mınıstriniń orynbasary Erlan Turǵynbaevty shaqyratynyn aıtyp, tarasqan.

Kelesi otyrysqa Erlan Turǵynbaev Kóshi-qon polısıasy departamentiniń bastyǵy Serik Saıynovty jáne Sabyrjan Seıtjanovty erte kelgenin, deldaldar jasaǵan jalǵan anyqtamany kórsetem dep, depýtattardan syn estigenin kezinde jazǵanbyz. Sol joly mınıstrdiń orynbasary depýtattarǵa «QR İshki ister mınıstrligi Syrtqy İster mınıstrligi arqyly Qazaqstandaǵy Qytaı Elshiliginiń qabyldaýyn surap, Hat jazamyz. Sol kezdesýde Elshilikten bul másele týraly suraımyz» – dep, ýáde bergen. Biz de Qytaı Zańyn aýdarmasymen qosyp, Erlan myrzanyń qorjynyna salyp jibergen edik. E.Turǵynbaev ýádesinde turyp, Qytaı Halyq Respýblıkasynyń Elshiligine hat jazypty. Elshilikten, mine, jaýap ta kelip úlgirdi. Erlan Zamanbekuly er eken! Uly Abaı aıtqan «Sóz ben isiń bir bolsyn!» degen osy! Juz jasańyz, Erekem!!!

Osy nátıjege jetýge yqpal etken Májilistegi jumys tobynyń jetekshisi Gúlnár Súleımenqyzyna, jumys tobyndaǵy Aldan Zeınollauly, Nurtaı Salıhuly, Baqytbek Smaǵul, Merýert Aıtqajyqyzy, Almas Uzaquly… bastaǵan barlyq Halyq qalaýlylaryna biz kóp rahmet aıtýymyz kerek, aǵaıyn!

 Jalpy Kóshi-qon Zańynyń kóp talqylaýyna basty sebeptiń biri osy – «Sottylyqqa» baılanysty ANYQTAMANYŃ «jyry» boldy! Biz de bul Zań jobasynyń Qytaıdan keletin qazaqtar úshin quny kók tıyn bolǵaly turǵanyn, oralmandardy sergeldeńge salatynyn aıtyp, qadalyp otyryp aldyq…

«Eshten kesh jaqsy!» degen, aqyry Qytaı Elshiliginen jaýap alyp tyndyq!

Sonymen, atalǵan jaýap hatynda Qytaı Elshiligi: «Qytaı aýmaǵynda ákimshilik jáne qylmystyq ister boıynsha  ortaq derekqordyń joq bolýyna baılanysty, azamattyń sottylyǵy nemese sottalmaǵany týraly anyqtamalardy ótinish berýshiniń turǵylyqty jeri boıynsha QHR Qoǵamdyq qaýipsizdik  mınıstrliginiń  ár  provınsıasyndaǵy  nemese  qaladaǵy aýmaqtyq polısıa  bólimsheler  beredi. Bul anyqtamalardyń  ortaq  standarty  nemese úlgisi bekitilmegen» dep jazypty. Sodan keıin: Elshiliktiń Konsýldyq bólimi Qazaqstanǵa QHR azamattarynyń kópshiligi Shyńjań-Uıǵyr avtonomıalyq aýdanynan keletindikten, atalǵan aýdannyń quzyretti organdary beretin anyqtamalardyń jáne olarǵa laýazymdy tulǵalardyń qoıatyn qoly men mórleriniń úlgilerin usynýy týraly Qytaı halyq Respýblıkasynyń Syrtqy ister mınıstrligine   saýal joldaǵanyn jáne jaýap kelip túsken jaǵdaıda qosymsha habarlanatyndyǵyn jetkizedi.

Osylaı deı kelip Qazaqstandaǵy Qytaı elshiligi: «Kirý men shyǵý máselelerin retteý týraly» 2012 jyly 30 maýsymdaǵy QHR Zańynyń 12-babynyń 2, 3-tarmaqtaryna sáıkes, eger de Qytaı azamaty sottalyp, onyń merzimi ótelmegen bolsa, azamatqa qarsy qylmystyq is qozǵalyp ne qylmys jasady dep kúdikke ilinip, tergeý ústinde bolsa, sondaı-aq aıaqtalmaǵan azamattyq sottyq is boıynsha eldiń aýmaǵynan tys ketýge shekteý qoıylǵan jaǵdaıda, oǵan shetelge shyǵýǵa tyıym salynýy múmkin.«Pasporttardy berý týraly» 2006 jyly 29 sáýirdegi QHR Zańyna sáıkes bul sanattaǵy Qytaı azamattaryna ulttyq pasporttar resimdelmeıdi (aqparat qosa tirkelgen)»–dep anyqtap jazypty.

Demek, «Pasporttardy berý týraly» 2006 jyly 29 sáýirdegi QHR Zańyna sáıkes, bizdiń Úkimet usynǵan «aýyr nemese asa aýyr qylmys jasaǵany úshin alynbaǵan nemese ótelmegen sottylyǵy bar;» azamattarǵa  Qytaı ulttyq pasport bermeıdi. Bul – pasporty joq adam shetelge de shyǵa almaıdy degen sóz! Bizdiń Úkimetke talmaı aıtyp júrgen ýájimiz rastaldy!!!

Endi Qytaıdan keletin qandastarymyzdan «Sottylyq» týraly ANYQTAMA suraý artyq! Osy sergeldeń de jetedi! «Ortaq  standarty  nemese úlgisi bekitilmegen» anyqtama kimge kerek!? Oǵan basylatyn tańbanyń bári hansýlardyń qolynda. Qazaqtardy telmeńdetip qoıý – eldigimizge syn!!

Eń jaqsysy bul máseleni Zań jobasynda sheshken durys! Bolmasa,  «Shyǵý paraǵyn» kúshinen qaldyrǵan №315 buıryq sekildi QR İshki ister mınıstrligi arnaıy buıryq shyǵarý arqyly sheshse de bolady!

Aıtpaqshy, Zań jobasy erteń Májilistiń ekinshi oqylymyna joldanady.

Aýyt Muqıbek

Derekkóz: Abai.kz