Assambleıanyń kezekten tys otyrysynda jasóspirimder quramasynyń 2024 jylǵy Ońtústik Koreıada ótken IV qysqy jasóspirimder Olımpıadasyndaǵy nátıjesi qorytyndylanyp, shilde aıynda Parıjde ótetin jazǵy Olımpıada oıyndaryna daıyndyǵy talqylandy, sondaı-aq, UOK quryltaı qujattaryn zań normalaryna sáıkes ózektendirý, UOK basqarý organdarynyń ókilettik merzimin bir merzimge jetkizý máseleleri jáne 2015-2023 jyldar aralyǵyndaǵy Qazaqstan UOK qyzmetiniń kórsetkishi sóz boldy. 

QR UOK prezıdenti Tımýr Qulybaev Bas Assambleıa múshelerine uıym prezıdenti retindegi ókilettigin merziminen buryn toqtatý týraly sheshim qabyldanǵanyn habarlady. 

Bas Assambleıa músheleriniń daýys berý qorytyndysy boıynsha QR UOK prezıdenti bolyp -  qazaqstandyq boksshy, 2004 jylǵy Afıny Olımpıadasynyń kúmis júldegeri, kóptegen  ataqtyń ıesi Gennadıı Golovkın saılandy. 

«Jańa laýazymda elimizdiń atynan áreket etý - men úshin zor mártebe. Maǵan Qazaqstan Ulttyq olımpıadalyq komıtetin basqarýdy usynǵanda, qazaqstandyq sportty damytýǵa óz úlesimdi qosýǵa múmkindik berse ǵana,  kandıdatýramdy usynatynymdy aıttym. 

Ózderińiz biletindeı, men saıasatker de, sheneýnik te emespin. Óz áreketimdi sózben emes, ispen dáleldep úırengenmin. Bizdiń aldymyzda turǵan eń mańyzdy mindetterdiń biri -  halyqaralyq qarym-qatynasty retteý dep bilemin. 

Osy oraıda, meniń óz kózqarasym, jyldar boıy jınalǵan halyqaralyq tájirıbem baryn, komanda baryn aıtqym keledi. Al eń bastysy jáne meniń kópten bergi qalaýym – bul barlyǵyn da ózimniń týǵan elimde júzege asyrý», - dedi jıynda sóz alǵan Golovkın.