"Almaty halyqaralyq áýejaıynyń aǵa vıse-prezıdenti Sımon Zıtsers qyzmetine esh qatysy joq, jeke sebepteri boıynsha ornyn bosatty", delingen áýejaıdyń baspasóz qyzmetiniń habarlamasynda.

Onyń ornyna basqa maman taǵaıyndalatyny naqtylanady.

Aıta ketsek, 2023 jyly 28 jeltoqsanda áýejaıdyń eki túrik top-menedjeri: komersıa jónindegi aǵa vıse-prezıdent Ietkın Chetın Paker, birinshi vıse-prezıdent Fatıh Ómir aıaq-astynan qyzmetinen ketkeni belgili boldy.

2024 jyly qańtarda BAQ betterinde Almaty halyqaralyq áýejaıyna tintý júrgizilip, taǵy bir top-menedjer Ýfýk Serttiń ustalǵany týraly aqparat paıda bolǵan. Biraq áýejaı basshylyǵy bul málimetti rastamady.

Negizinen, 2021 jyly 30 sáýirde TAV Airports túrik kompanıasy Almaty halyqaralyq áýejaıyn satyp alǵanyn jarıalandy. Baǵa 50 mln dollarǵa deıin tómendetilgeni de belgili boldy.

Venus Airport Investments B. V. (Amsterdamda tirkelgen) kompanıasy "Almaty halyqaralyq áýejaıy"AQ-tyń jalǵyz aksıoneri bolyp tabylady. Óz kezeginde, Venus Airport Holdings B. V. (sonymen qatar Nıderlandy ıýrısdıksıasynda qarasty) áýejaı aksıasynyń 10% jáne odan da kóp úlesine ıe. Bul kompanıa tolyǵymen Tımýr Qulybaevtyń qaraýyndaǵy sıngapýrlyq Steppe Capital Pte Ltd kompanıasyna tıesili.