Segiz aıǵa sozylǵan tergeýden soń Aqtaý turǵyny 22 jylǵa bas bostandyǵynan aıryldy. Endi ol jazasyn qatań rejımdegi kolonıada óteıdi. Alaıda kináli óz aıybyn moıyndamaı, marqum sýısıd jasady dep otyr.Qylmystyq is boıynsha marqum Valerıanyń anasy Svetlana Shalnovanyń ólimine qatysty ádil úkim shyǵarylǵanyn aıtty. Ol isti tergeýge atsalysqan barsha janǵa alǵysyn bildirdi. 

– Sot oǵan qylmysy boıynsha laıyqty jaza kesti. Endi ol qatań rejımdegi kolonıada 22 jyl jazasyn óteıdi. Osy jaǵdaı bizdiń qaıǵymyzǵa az bolsa demeý boldy, – dedi marqumnyń anasy.

22 jylǵa sottalǵan aıyptalýshy QR qylmystyq kodeksiniń 99-babynyń 2-bóliminiń 3, 10-tarmaqshalary jáne 120-baptyń 1 bólimi boıynsha jaýapqa tartyldy. Budan bólek, qylmystyq isti tergeý kezinde kedergi keltirýge tyrysqan quqyq qorǵaý qyzmetkerleri tergeletin bolady. 

Valerıa Shalnovanyń máıiti byltyr shilde aıynyń basynda Aqtaý irgesindegi kanaldan tabylǵan bolatyn. İzdestirý kezinde oqıǵaǵa kináli kúdikti bir kúnnen keıin tabylyp, ol qyzdyń burynǵy jigiti ekeni anyqtalǵan.