Jýyrda Shymkent qalasy áskerı gornızony sotynda atyshýly Baızaqtaǵy jarylys qatysty appelásıalyq sot sheshimi tyńdaldy. Sheshim Astana qalasynda shyǵaryldy. Buǵan deıin árqaısy 9 jylǵa sottalǵan qos sarbaz Áset Áshirbaı men Erbolat Turanov onlaın qatysty.

Sotqa qos jigittiń ata-anasy da kelip, jazanyń jeńildeýin taǵatsyzdana kútken edi. Alaıda apelásıalyq sot sarbazdarǵa bergen jazany odan ári qatańdatyp jiberdi.

- Jazalardy ishinara qosý arqyly Turanovqa túpkilikti 13 jyl bas bostandyǵynan aıyrý jazasy taǵaıyndalsyn. Jazany orta mekemede óteý belgilensin, – dedi sýdıa. Sonymen sot buǵan deıin 9 jylǵa sottalǵan Erbolat Turanov pen Áset Áshirbaıdyń jaza merzimine taǵy 4 jyldan qosty. Osylaısha, Baızaqtaǵy áskerı bólimde otan aldyndaǵy boryshyn ótegen qos jigit endi 13 jylyn túrmede ótkizedi. Sondaı-aq buǵan deıin sot zalynan bosatylǵan olardyń 2 ofıseri 5 jylǵa deıin bas bostandyǵynan aıyryldy. Olar sotqa Astana qalasynan onlaın qatysqan.

Alaıda sarbazdar sot sheshimimen kelispeıtindikterin aıtyp: "Ádilettik joq. Báribir ádilettik joq. Alla jazalaryn bersin olardyń. Ádiletsiz Qazaqstan, múldem ádiletsiz. Bizdi 13 jylǵa bas bostandyǵymyzdan aıyryp jatyr. Ne úshin?”, – dedi sarbazdardyń biri narazylyǵyn bildirdi.

Endi mine, qos sarbaz ben prokýratýra bergen apelásıadan soń ofıserlerdiń ekeýi 5 jylǵa, al jaýyngerler 13 jylǵa bas bostandyǵynan aıryldy. 2021 jyly Jambyl oblysy, Baızaq aýdanyndaǵy oq-dári saqtaıtyn qoıma jarylyp, 18 adam jan tapsyryp, 81 azamat jaralanǵan. Bul isti jasady degen aıyp sol jerde áskerı boryshyn ótep júrgen Erbolat Turanov pen Áset Áshirbaıǵa taǵyldy.

Eske salsaq, byltyr 20 qazanda Baızaqtaǵy jarylys úshin qos sarbaz Áset Áshirbaev pen Erbolat Turanov "Bótenniń múlkin qasaqana joıý jáne búldirý" boıynsha 9 jyldan sottalǵan edi.